И.В.Савицкий номидаги Қорақалпоғистон Республикаси санъат музейи маъмурияти Нукус музейи дўстлари жамғармаси ёпилиши ҳақидаги хабарларни изоҳлади, деб ёзади «Газета.uz».
Нидерландияда жойлашган Нукусдаги музей дўстлари хайрия жамғармаси (Friends of Nukus Museum) 2018 йил охирида тарқатиб юборилиши ҳақида журналистларга унинг раиси Дэвид Пирс хабар берган эди.
Мазкур Нукусдаги И.В.Савицкий номидаги Қорақалпоғистон Республикаси санъат музейига моддий ёрдам, китоблар ва ускуналар етказиб, ёрдам қўлини чўзиб келган. Жамғарманинг тарқатиб юборилишига сабаб сифатида Пирс сўнгги уч йилда музейга берилган хайрия совғалари, жумладан, аудиоускуналар ва китобларнинг ғойиб бўлганлигини келтирган. «Бизга маълум бўлишича, улар ё мусодара этилган ёки ўғирлаб кетилган», – деган Пирс.
Савицкий музейи маъмурияти баёнотида айтилишича, музейга берилган хайрия совғалари, шу жумладан, аудио мосламалар ва босма маҳсулот (китоблар, откриткалар) жамғарма кўмагида чиқарилган ва 2015 йилгача бўлган даврда музейга ҳадя қилинган.
«Босма маҳсулотларнинг барчаси ва барча аудиогидлар музейда турибди. Аммо 2015 йилда бошланган, музейни текшириш ва инвентаризация қилиш чоғида ушбу босма маҳсулотлар печатланган (солиқ хизмати томонидан), ва музей маъмурияти ҳозирча муҳрни бузиш ва у ердаги маҳсулотларни тегишли органлар рухсатисиз олиш ҳуқуқига эга эмас», — дейилади баёнотда.
«Музей раҳбарияти ушбу масала устида ишламоқда. Тез орада барча босма маҳсулот жамоатчиликка тақдим этилиши ва музейимиз дўконларида пайдо бўлишига умид қиламиз», — дея таъкидлашди маъмуриятда.
Музейдагилар қўшимча қилишича, сўнгги уч йил давомида жамғарма музейга ёрдам кўрсатмаган, шу жумладан, молиявий ёрдам ҳам. «Биз жамғарма ўз фаолиятини тўхтатмаслигига ва музей билан ҳамкорлик қилишига қаттиқ умид қилиб қоламиз», — дейилади баёнотда.
Изоҳ (0)