8 ноябрь куни Берлин шаҳрида ҳукумат делегациясига раҳбарлик қилаётган Ўзбекистон ташқи ишлар вазири Абдулазиз Комилов Германия ташқи ишлар вазири Ҳайко Маас билан учрашди. Бу ҳақда ТИВ матбуот хизмати хабар берди.
Суҳбат чоғида икки томонлама муносабатларнинг долзарб масалалари ва сиёсий-дипломатик, савдо-иқтисодий, инвестицион, маданий-гуманитар ва бошқа соҳаларда, шунингдек, «Ўзбекистон - Европа Иттифоқи» шаклидаги ҳамкорликни ривожлантириш истиқболлари муҳокама қилинди.
Учрашувда икки томон кун тартибидаги бошқа масалалар ва халқаро муаммолар юзасидан фикр алмашилди.
Афғонистондаги вазият муҳокамаси чоғида, Афғонистонда тинч мулоқотни бошлашдан томонлар манфаатдор эканлиги тасдиқланди ва бу мамлакатдаги лойиҳаларни амалга оширишда ҳамкорлик қилишга тайёр эканлиги таъкидланди.
Шу куннинг ўзида Берлин шаҳрида ташқи ишлар вазирликлари ўртасида сиёсий маслаҳатлашувларнинг навбатдаги раунди бўлиб ўтди.
Шунингдек, Абдулазиз Комилов Берлин шаҳрида Германия канцлерининг ташқи сиёсат ва хавфсизлик сиёсати масалалари бўйича маслаҳатчиси Ян Ҳеккер билан ҳам учрашди.
Суҳбат чоғида икки томонлама муносабатларни ривожлантиришнинг долзарб масалалари, Ўзбекистон – Германия ҳамкорлигини чуқурлаштиришнинг истиқболлари юзасидан фикр алмашилди.
Умумий кун тартибини аниқ мазмун билан бойитиш, икки томонлама муносабатларга узоқ муддатли тус бериш борасида томонларда қизиқиш мавжудлиги тасдиқланди.
Изоҳ (0)