2019 йилнинг март ойида Ўзбекистон олимпия терма жамоаси Тошкентдаги Осиё чемпионати мусобақасининг саралаш босқичида иштирок этади. 7 ноябрь, чоршанба куни мазкур саралаш босқичига қуръа ташланди, деб хабар беради ЎФА матбуот хизмати.
Қуръага кўра, ўзбекистонлик футболчилар «F» гуруҳида Ҳиндистон, Тожикистон ва Покистон терма жамоалари билан Осиё чемпионати финал босқичига чиқиш учун курашга киришади. Саралаш ўйинларига 2019 йилнинг 22—26 март кунлари Тошкент шаҳри мезбонлик қилади.
Регламентига кўра, саралаш баҳслари шарқ ва ғарб минтақаларига бўлинган ҳолда ўтказилади. Ҳар икки минтақадаги гуруҳда 1-ўринни қўлга киритган жами 11 та терма жамоа Осиё чемпионатига тўғридан-тўғри йўлланмани қўлга киритади. Уларга ўз гуруҳларида энг яхши натижа қайд этган 4 та иккинчи ўрин соҳиблари ҳамда мезбон сифатида Таиланд олимпиячилари ҳам қўшилади.
Таиланддаги Осиё чемпионатида 16 та терма жамоа қатнашади. 1, 2 ва 3-ўринни қўлга киритган терма жамоалар Токио—2020 Олимпиадасида қатнашиш имкониятига эга бўлади.
Изоҳ (0)