Наманган муҳандислик-технология институтининг 3 нафар олими Тожикистондаги олий ўқув юрти фахрий профессорига айланди. Бу ҳақда «Дарё»га институт матбуот хизмати маълум қилди.
Институт илмий ишлар ва инновациялар бўйича проректори Авазбек Обидов, табиий толаларни дастлабки ишлаш технологияси кафедраси мудири Олимжон Саримсоқов, ушбу кафедра профессори Ҳамидхон Аҳмадхўжаев Тожикистонда хизмат сафарида бўлди. Улар сафар давомида Тожикистон технология университети, Данғара давлат университети ҳамда Кулоб шаҳридаги технологиялар ва инновацион менежмент институти фаолияти билан танишди.
Институт олимлари дастлаб Душанбе шаҳридаги Тожикистон технология университети ўқув жараёни, илмий-тадқиқот ишлари, лабораториялар ҳамда талабалар учун яратилган шароитлар билан танишди. Университет талабалари учун «Пахтани дастлабки ишлаш» фани бўйича ўқув машғулотларини олиб борди.
Данғара давлат университетида ҳам талабаларга дарс машғулотлари ўтказилди. Университет билан ҳамкорлик қиладиган Хитой фирмасига қарашли тўқимачилик корхонасидаги ишлаб чиқариш жараёни кўздан кечирилди.
Институт делегацияси Кулоб шаҳридаги технологиялар ва инновацион менежмент институтида ташкил этилган илмий-амалий анжуманнинг очилиш маросимида ҳамда сексияларда ўтказилган маърузаларда иштирок этди. Талабалар учун тўқимачилик ва енгил саноат соҳаси бўйича ўтказилган дарс машғулотлари ўзаро тажриба алмашишда муҳим ўрин тутди.
Олимлар мазкур институтнинг фахрий профессори унвонига лойиқ кўрилди. Шунингдек, НамMTИ билан Данғара давлат университети ҳамда Кулоб технологиялар ва инновацион менежмент институти ўртасида ўзаро ҳамкорлик меморандумлари имзоланди.
Изоҳ (0)