Россия Либерал-демократик партияси раиси Владимир Жириновский бошчилигидаги делегация 2 ноябрь куни Бухорога келди. Бу ҳақда ЎзА хабар бермоқда.
Россия парламенти қуйи палатаси депутатларидан иборат делегацияни Бухоро халқаро аэропортида Ўзбекистон Сенати Раиси биринчи ўринбосари Содиқ Сафоев, Бухоро вилояти ҳокими Ўктам Барноев ва кенг жамоатчилик вакиллари кутиб олган.
Куннинг иккинчи ярмида Россия делегацияси аъзолари Бухоронинг диққатга сазовор жойларини зиёрат қилади. Хусусан, Арк қалъасида бўлиб, бу ерда жойлашган Бухоро давлат бадиий меъморчилик музей-қўриқхонаси ва унинг тасарруфидаги «Ситораи Моҳи Хоса» халқ амалий безак санъати музейи, шунингдек, бошқа кўплаб тарихий обидалар, ҳунармандчилик марказлари фаолияти билан танишади.
Жириновский Бухорога келишидан аввал Тожикистон пойтахти Душанбеда бўлган. «Turon 24»нинг ёзишича, Жириновский у ерда собиқ Иттифоқ республикалари Россия таркибига ихтиёрий қўшилиши тарафдори эканлигини билдирган. Қайд этишларича, Жириновский 2010 йили Россия таркибида Ўрта Осиё федерал округини тузишни таклиф қилган эди. Ушбу чақириғига Душанбеда изоҳ берар экан, Жириновский: «Мен Европа Иттифоқига ўхшаш бирлашув тарафдориман. Мен бугунги кунда фақат 300 миллиондан ортиқ нуфузга эга давлатларгина яшаб қола олишига ишонаман», — деб айтган.
Таъкидлаш ўринлики, Владимир Жириновский Россия ва Марказий Осиёда миллатчилик, хусусан, Ўзбекистон ва ўзбеклар ҳақидаги эпатаж чиқишлари билан машҳур сиёсатчи ҳисобланади. Жириновский Руминия, Болгария, Германия ва Қозоғистонни ҳақоратловчи баёнотларидан кейин ушбу давлатларда «исталмаган шахс» (персона нон грата) деб эълон қилинган ва ушбу мамлакатларга киришига тақиқ қўйилган.
Изоҳ (0)