Хоразмда кўприк қулади. Иншоот юк машинасининг оғирлигини кўтара олмай қолган (фото)

«Урганч—Чолиш» йўлининг 10-километридаги канал устидан ўтган кўприк 1 ноябрь куни тунда қисман қулаган. Маълумотларга кўра, кўприк юк автомобилининг оғирлигини кўтаролмай қулаган. Транспорт воситаси унинг устидан ўтиб кетишга улгурган, жабрланганлар йўқ.

«Turon 24»нинг хабар беришича, воқеа тахминан соат 19:15 да юз берган. «Катта юк машинаси ўтаётганда кўприкнинг бир томони ўпирилиб тушган. Юк машинаси кўприкдан ўтишга улгурган. Унинг изидан келаётган Damas ҳайдовчиси чуқурни кўриб, шошиб қолади ва рулни кескин буриши натижасида машина ағдарилиб кетади. Жабрланганлар йўқ», — деб ёзади агентлик.

2 ноябрь куни ҳолатига «Урганч—Чолиш» йўлининг 10-километри ёпиб қўйилган — ундан Хоразм вилоятини Қорақалпоғистоннинг Беруний тумани билан боғловчи Амударё кўпригига ўтишнинг иложи йўқ. Барча транспорт воситалари айланма йўлларга йўналтирилмоқда. Фуқаролар эса кўприкнинг бутун қолган қисмидан ўтказилмоқда.

«Ҳозирги вақтда қулаб тушган кўприк ёнидан бошқа — вақтинчалик (кичикроқ) кўприкнинг қурилиши бошлаб юборилган. Уни 3 ноябрь куни ишга тушириш режалаштирилмоқда. Қулаб тушган катта кўприкнинг қачон тикланиши маълум эмас», — дея хабар бермоқда «Kun.uz».

Аввалроқ, 14 август куни Хоразм вилоятининг Хонқа туманида 1975 йилда қурилган кўприк қулаган, ҳодиса оқибатида тўрт киши жабрланган эди.