2 ноябрь куни эрталаб Қашқадарё вилоятида «Шўртангазкимё» мажмуаси ишчи-ходимлари пахтага олиб кетилди. Бу ҳақда «Turon 24» маълум қилди.
Қарши шаҳридаги «Геолог» спорт мажмуаси ёнида жам бўлган завод ишчи- ходимларидан бирининг «Turon 24» мухбирига маълум қилишича, завод ходимлари Нишон ва Касби туманидаги теримчиларга кўмаклашиш мақсадида 20 кунга мажбурий равишда пахтага жалб қилинмоқда.
«Агар бормайман, десак шу заҳоти ишдан бўшатишади, — дейди исмини ошкор қилишни истамаган ишчи-ходимлардан бири. — Ўрнимизга кўз тикиб турганлар жудаям кўп. Ишимиздан ажралишни истамаймиз. Бошқа чорамиз йўқ».
Пахтага иккинчи маротаба мажбуран жалб қилинган ишчи-ходим теримга чиқаришда мантиқли асос кўрмаётганидан, чунки майдонларда пахта қолмаганидан шикоят қилди.
«Ҳозир далада энг яхши теримчи ҳам нари борса 20 килограмм пахта тераяпти, — дейди у. — Чунки далада пахта йўқ. Ўтган йили ҳам пахта тугагандан сўнг ҳар куни 20 килограмм кўсак теришга мажбурлашган, шундан сўнггина дам олишга рухсат беришарди. Бу сафар ҳам шундай бўлади шекилли».
«Turon 24» мухбирининг кузатувларига кўра, завод ходимларидан иборат теримчилар ўтирган автобусларнинг 2 таси Касби туманига, қолган 2 таси эса Нишонга йўл олди.
Изоҳ (0)