Рустам Холматов Тошкент вилояти ҳокими ўринбосари этиб тайинланди. Ислом Каримов уни 2013 йили қаттиқ танқид қилиб, Тошкент вилояти ҳокими лавозимидан олганди

Рустам Қурбонназарович Холматов Тошкент вилояти ҳокимининг қишлоқ ва сув хўжалиги масалалари бўйича ўринбосари этиб тайинланди. Бу ҳақда, ўз манбасига асосланиб, «Kun.uz» хабар бермоқда.

У Оққўрғон ва Бекободдаги воқеалар ортидан ишдан бўшаган вилоят ҳокими ўринбосари ўрнини эгаллади. Холматов бунгача Жиззах вилояти ҳокимининг қишлоқ ва сув хўжалиги масалалари бўйича ўринбосари сифатида ишлаб келаётган эди.

Рустам Холматов 1961 йилда Тошкент вилояти Оққўрғон туманида туғилган. У Тошкент халқ хўжалиги институти (ҳозирги — Тошкент давлат иқтисодиёт университети)ни иқтисодчи мутахассислиги бўйича битирган.

У 1995 йилдан 2003 йилгача Тошкент вилояти ҳокимининг биринчи ўринбосари, кейинроқ Чиноз ва Қуйи Чирчиқ туманлари ҳокими бўлиб ишлаган. 2008 йилдан 2013 йилгача эса Тошкент вилояти ҳокими бўлган.

2013 йилнинг апрелида Ўзбекистон Биринчи Президенти Ислом Каримов Рустам Холматовни ўз қўли остидагиларга зуғум ўтказишда айблаб, ишдан олганди.

«У 2017 йилнинг апрелида Жиззах вилояти ҳокимига ўринбосар сифатида давлат ишига қайтганди», — деб ёзади «Kun.uz».