Францияда Хэллоуин байрамидаги тартибсизликлар учун 100 дан ортиқ киши ҳибсга олинди

Францияда полиция ходимлари Хэллоуин байрамидаги тартибсизликларни бостириш жараёнида 116 кишини ҳибсга олди. Бу ҳақда «Корреспондент.net» хабар бермоқда.

Тартибсизликлар мамлакатнинг қатор шаҳарлари, жумладан Лион, Тулуза, Рене ва Нантда юз берди.

Тартибсизликлар иштирокчилари автомобиль ва чиқинди урналарини ёқиб юборган. Шунингдек улар ҳуқуқ-тартибот органлари ходимларига қўпол муомалада бўлган.

Франция ички ишлар вазири Кристоф Кастанернинг қайд этишича, «Хэллоуин байрами — безорилик қилиш, дегани эмас».

У полиция ходимларига ҳужум қилишни «умуман қабул қилиб бўлмайдиган» деб баҳолади.

Францияда 31 октябрдан 1 ноябрга ўтар кечаси хавфсизликни таъминлаш учун 15 мингга яқин полициячи жалб қилинган.

«Мен ўша кечада хавфсизликни таъминлаш учун жалб қилинган қуролли кучларнинг ҳаракатларини қўллаб-қувватлайман ва олқишлайман», — дейди вазир.