Қозоғистон пойтахти Остонада 2 ноябрь куни мамлакат президенти Нурсултон Назарбоев МДҲга аъзо мамлакатлар ҳукумат раҳбарлари билан учрашди. Бу ҳақда Қозоғистон президенти матбуот хизмати хабар бермоқда.
Учрашувда Қозоғистон бош вазири Бақитжан Сағинтаев, Озарбайжон бош вазири Наврўз Мамедов, Беларусь бош вазири Сергей Румас, Қирғизистон бош вазири Муҳаммадқалий Абулғозиев, Тожикистон бош вазири Қоҳир Расулзода, Ўзбекистон бош вазири Абдулла Арипов, Россия бош вазири Дмитрий Медведев, Арманистон бош вазири биринчи ўринбосари Арарат Мирзоян, Туркманистон ҳукумат раиси ўринбосари Г.Мурадов, МДҲ Ижроия қўмитаси раиси Сергей Лебедев қатнашган.
Учрашувда Қозоғистон президенти МДҲ Ҳукумат раҳбарлари кенгашининг Остонада бўлиб ўтадиган навбатдаги йиғилиши «ўзаро манфаатли алоқаларни янада ривожлантиришга хизмат қилиши»га умид билдирган. Хабар беришларича, учрашувда Қозоғистон бош вазири Бақитжан Сағинтаев ва Россия бош вазири Дмитрий Медведев ҳам сўзга чиққан.
Аввалроқ Абдулла Арипов раҳбарлигидаги Ўзбекистон делегацияси МДҲ Ҳукумат раҳбарлари кенгаши мажлисида қатнашиши ҳақида хабар берилган эди.
Изоҳ (0)