Ўзбекистон Президенти Шавкат Мирзиёев 1 ноябрь куни «Халқаро бахшичилик санъати фестивалини ўтказиш тўғрисида»ги қарорни имзолади. Қарор матни ЎзАда эълон қилинди.
Президент ушбу қарор билан Маданият вазирлиги, Фанлар академияси ҳамда Сурхондарё вилояти ҳокимлигининг Термиз шаҳрида ҳар икки йилда бир марта Халқаро бахшичилик санъати фестивалини ўтказиш таклифини маъқуллаган.
Ҳужжатда қайд этилишича, илк фестиваль 2019 йилнинг 5—10 апрель кунлари ўтказилади. Фестивальга хорижий давлатлардан таниқли фолклоршунос олимлар, бахши, шоир, оқин ва жировлар, ижодий жамоалар, оммавий ахборот воситалари вакиллари ва фахрий меҳмонларни таклиф этилади.
Фестиваль доирасида Термиз шаҳридаги «Сурхондарё санъат саройи» давлат муассасаси майдони ҳудудида бахшичилик санъатига оид турли кўргазмалар, миллий созлар ва либослар, ҳунармандчилик буюмлари, тасвирий ва амалий санъат асарлари, ҳайкалтарошлик намуналари, бадиий ва ҳужжатли фильмлар, аудио ва видео дисклар, китоблар, альбомлар, фотосуратлар намойиши ва уларнинг сотуви ташкил этилади.
Маълумот учун, 2018 йилдан бошлаб Шаҳрисабз шаҳрида ҳар икки йилда бир марта Халқаро мақом фестивали ўтказилиши бошланди. Самарқандда эса 1997 йилдан бери ҳар икки йилда бир марта «Шарқ тароналари» халқаро мусиқа фестивали ўтказилади.
Изоҳ (0)