Намангандаги коллеж ўқитувчиси ўқувчиларни ураётгани акс этган видеоси тарқалган эди. Ўқитувчи ўз ҳаракатларига изоҳ берди (видео)

Наманган вилоятидаги хизмат кўрсатиш коллежи ўқитувчиси машғулотлардан қочиб кетадиган ўқувчиларни ураётгани ва ҳақоратлаётгани акс этган видео ижтимоий тармоқларда тарқалганидан сўнг «Севимли» телеканалининг «Замон» дастури ижодкорлари ушбу ҳолат юзасидан журналистик суриштирув тайёрлади, деб ёзади «Газета.uz».

Ўқитувчининг сўзларига кўра, ўқувчилар жуда кўп марта дарс қолдирган. «Аксарият болаларнинг тарбияси оғир. Уларга яхшиликча гапириб, тартибга чақиришга ҳаракат қилдик. Лекин, уларни уришни оқламайман» , — дейди коллеж директори Баҳодир Эргашев.

Ўқувчиларни урган ўқитувчи Рашид Сафаров ўша куни улар дарсга кечга қолганини, бундан ташқари улар иккинчи дарсдан сўнг қочиб кетган.

«Ўқувчилар жуда кўп дарс қолдиради, дарслардан қочиб кетади. Биринчи дарсга келмайди. Ўша куни улар девордан сакраб ўтиб газ трубасига зарар етказган. Мен буни ўқувчиларни тартибга чақириш ва уларни тўғри йўлга бошлаш мақсадида қилдим. Жаҳл устида ортиқча гаплар гапириб юбордим» — дейди у.

Телеканалга берган интервьюсида ўқувчилар ўз хатосини тан олган ва ўқитувчи ҳақ эканлигини айтган. Улар огоҳлантириш олган.

Дастурда қайд этилишича, ўқитувчи Рашид Сафровга нисбатан тегишли чоралар кўрилган.

https://www.facebook.com/Zamontv/videos/2040238639599439/