23—25 октябрь кунлари «Ўзэкспомарказ» мажмуасида хорижий илмий-инновацион марказлар, инвестицион фондлар, технологик агентликлар, технопарклари ва бизнес инкубаторларининг фаол иштирокида InnoWeek-2018 Халқаро инновацион ғоялар ҳафталиги бўлиб ўтди. Бу ҳақда Инновацион ривожланиш вазирлиги матбуот хизмати хабар берди.
Ҳафталикда жами иштирок этганлар сони (ташриф буюрувчи бейжиги расмийлаштирилган ҳолатда) – 5278 нафарни ташкил этган бўлса, вазирлик, давлат идоралари ва хўжалик бошқарув органларидан иштирок этган мутахассислар – 318 нафарга етди.
Хорижий ва маҳаллий ишбилармонлар ҳамда йирик компаниялардан 668 вакил қатнашди, олий таълим муассасалари ва илмий-тадқиқот институтларидан иштирок этган мутахассислар сони 1966 тани ташкил этди.
Умумтаълим мактаб ўқувчилари ҳам фаол бўлишди, улардан 537 ўқувчи келди. Диний идоралар уламолари Халқаро кўргазма қизиқиш билдириб, ҳафталик даврида улардан 214 вакили ташриф буюрди. Тижорат банкларидан эса 65 нафар ҳодим InnoWeek’да иштирок этди.
Халқаро инвестицион-инновацион форумда 54 нафар спикер турли мавзуларда ўзларининг маърузалари билан қатнашди.
Кўргазмада хорижий ва маҳаллий ҳамкорлар билан жами 259,59 миллион АҚШ доллари миқдорида инвестиция киритиш бўйича битимлар ва 1,7 миллиард сўм миқдорида олди-сотди шартномалари имзоланди. Уларнинг сони эса 38 тани ташкил этди.
Халқаро инновациялар кўргазмасида ўз инновацион ишланмалари билан Андижон тиббиёт институти, Наманган муҳандислик-технология институти, Тошкент автомобиль йўлларини лойиҳалаш, қуриш ва эксплуатацияси институти, Тошкент ахборот технологиялар университети, Тошкент давлат техника университети, Тошкент кимё-технология институти, Тошкент тиббиёт академияси, Тошкент шаҳридаги Турин политехника университети, Қорақалпоқ давлат университети талабалари иштирок этди.
Фавқулодда вазиятлар вазирлиги, Давлат божхона қўмитаси, «Ўзбекистон темир йўллари» АЖ, «Электрон ҳукумат» тараққиёт маркази, «Навоий» КМК, «Ўзметкомбинат» АЖ сингари давлат ва хўжалик бошқаруви органларининг инновацион ишланмалари Ярмаркага ташриф буюрган меҳмонларда катта қизиқиш уйғотишди.
МАДХ компанияси (Австрия) ишлаб чиққан чиплар ёрдамида аллергологик касалликлар бўйича 24 нафар респондент Аллерготест таҳлилини топширди.
Инновацион ғоялар ҳафталиги доирасидаги учинчи катта тадбир - International Robotics Challenge халқаро робототехника мусобақасида 6 мамлакатдан 24 та хорижий ва 40 та маҳаллий жамоа, 200 га яқин иштирокчилари қатнашди.
Изоҳ (0)