Қирғизистон Ташқи ишлар вазирлиги жами 10 нафар фарзанди бор қирғизистонлик уч аёлни Ироқ қамоқхонасидан ватанга қайтариш масаласини ҳал қилиш устида иш олиб бормоқда. Бу ҳақда «Sputnik» хабар бермоқда.
Аввалроқ россиялик сенатор Зиёд Сабсабий Бағдоддаги аёллар қамоқхонасидаги ўлимга ҳукм қилиниши мумкин бўлган аёллар орасида қирғизистон уч аёл ҳам борлиги, уларнинг 10 нафар ёш боласи борлигини маълум қилганди.
Улар ИШИД террорчилик ташкилоти сафига қўшилган эрлари томонидан Яқин Шарққа олиб кетилган ва уларнинг ўлимидан сўнг тақдир ҳукмига ташлаб қўйилган. Қирғизистон президенти Сўронбой Жеенбеков «РИА Новости»га берган интервьюсида бу вазиятнин назоратга олишини билдирган эди.
«Ташқи ишлар вазирлиги ҳозирда ушбу масала устида ишламоқда, бироқ унинг ҳам Ироқдаги имкониятлари жуда чекланган. Вазирлик ишни ҳамкор-давлатлар билан бирга ташкил этишга уринмоқда. Жаҳоннинг айрим ҳудудлари бўйича Россия, Қозоғистон билан келишувларимиз бор, ўша ерларда уларнинг элчихоналари Қирғизистон номидан иш кўриши мумкин. Ҳозир ТИВ шу билан шуғулланяпти», — деди Қирғизистон омбудсмени Тўкон Мамитов.
Ироқ томони бу уч аёл ҳақида Бишкекка расман ҳеч қандай маълумот бермаган. «Улар бизнинг фуқароларимиз экани ҳақида 100 фоизлик ахборот йўқ, чунки бу мамлакат расман бизга мурожаат қилгани йўқ. Уларнинг фамилияси қандай, қаерда туғилган, нимада айбланаётгани бизга айтилгани йўқ. Биз бошқа каналлар орқали ахборот оляпмиз», — деди омбудсмен.
Мамитовнинг қўшимча қилишича, тахминий маълумотларга кўра, бу аёллар чегарани ноқонуний кесиб ўтиш, шунингдек, террорчилик тузилмаларига алоқадорликда айбланмоқда. «Бу жуда жиддий айбловлар. Шунга қарамай, ҳукумат бу борада иш олиб боряпти», — деб қўшимча қилди Қирғизистон омбудсмени Тўкон Мамитов.
Изоҳ (0)