Тожикистон президенти Эмомали Раҳмон сентябр ойи ўрталарида Тоғли Бадахшон мухтор вилоятига ташрифи вақтида ҳудуддаги жиноятчилик даражасидан ғазабга тушган эди, шундан сўнг маҳаллий маъмурият ҳудуднинг норасмий етти етакчисидан жиноятларга барҳам беришни сўраган эди. «Sputnik»нинг ёзишича, энди бу норасмий етакчилар Эмомали Раҳмон билан учрашмоқчи.
Тожикистон давлат раҳбари билан учрашиш истагини тўрт бадахшонлик — Толиб Аёмбеков, Ёдгор Мамадасломов, Мунаввар Шанбиев ва Зоир Ражабов билдирган. Улар бунинг учун атайлаб Хорогдан Душанбега келган. Қайд этишларича, Тоғли Бадахшон расмийлари ҳудуд криминал етакчиларининг Тожикистон пойтахтига сафаридан бохабар.
«Улар презиздент билан учрашмоқчи, Хорогдаги уларнинг назаридаги реал вазият ҳақида давлат раҳбари билан гаплашмоқчи», — деди Тоғли Бадахшон мухтор вилояти раиси матбуот котиби Ғолиб Ниятбеков. ОАВ маълумотларига кўра, Душанбега келган эркаклар уларни уюшган жиноий гуруҳларнинг раҳбарлари ва криминал етакчилар деб ҳисоблашларига рози эмас. Норасмий етакчилар ўзларининг уюшган жиноятчиликка алоқадор эмаслигини исботлаш ниятида.
Аввалроқ Тожикистон ҳукумати Тоғли Бадахшоннинг норасмий етакчиларидан «жиноятчиликка барҳам бериш»ни талаб қилган, акс ҳолда уларни жазо кутаётганини билдирган эди. Огоҳлантириш 22 октябрь куни Тоғли Бадахшоннинг етти криминал етакчиси — Толиб Аёмбеков, Мамадбокир Мамадбокиров, Ёдгор Мамадасломов, Хурсанд Мазоров, Мунаввар Шанбиев, Зоир Ражабов ва Амриддин Аловацҳоевга топширилган.
Изоҳ (0)