Ўзбекистонда маъмурий судлар 9 ой давомида 16,5 мингдан ортиқ ишни кўриб чиқди

2018 йилнинг 9 ой мобайнида маъмурий судлар томонидан оммавий-ҳуқуқий муносабатлардан келиб чиқадиган 16,5 мингдан зиёд иш кўриб чиқилди, деб хабар беради ЎзА.

2018 йилнинг 9 ой мобайнида маъмурий судлар томонидан оммавий-ҳуқуқий муносабатлардан келиб чиқадиган 16,5 мингдан зиёд иш кўриб чиқилди. Бунинг натижасида 12,5 мингдан ортиқ фуқаронинг ҳуқуқи тикланди, 57 мансабдор шахсга интизомий жазо қўлланилди.

 Азиз Обидов​, Олий суди расмий вакили

Маъмурий судлар томонидан 160 минг 151 иш, яъни барча ишларнинг 57 фоиздан ортиғи сайёр суд мажлисларида кўриб чиқилди.

Қайд этилишича, йўл ҳаракати иштирокчиларининг мастлиги ёки маст эмаслигини аниқлаш учун текширувдан ўтишдан бўйин товлаши билан боғлиқ ҳуқуқбузарликлар бўйича 43 минг 605 нафар шахсга нисбатан маъмурий ишлар кўриб чиқилди. Шундан 4 минг 655 нафар шахсга нисбатан маъмурий қамоқ жазоси қўлланилди. 33,5 мингдан зиёд шахс эса транспорт воситасини бошқариш ҳуқуқидан маҳрум қилинди.

Транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши билан боғлиқ ҳуқуқбузарликлар бўйича 16 мингдан зиёд шахсга нисбатан маъмурий ишлар кўриб чиқилди. Шундан 13 минг 711 нафар шахсга нисбатан жарима жазоси қўлланилди. Мингдан ортиқ шахс эса транспорт воситасини бошқариш ҳуқуқидан маҳрум қилинган.

Маст ҳолда транспорт воситасини бошқариб йўл-транспорт ҳодисасини содир этган 908 нафар шахсга нисбатан маъмурий ишлар кўриб чиқилди.

Бундан ташқари, Олий суд Маъмурий ишлар бўйича судлов ҳайъати томонидан назорат тартибида 2 мингдан зиёд шикоят ва протестлар кўриб чиқилди. Шундан 445 таси иш материаллари асосида ўрганилди. Қуйи судлар томонидан чиқарилган 36 қарор бекор қилинди ва 33 суд қарори ўзгартирилди.