Ақтўбеда 52 ўзбекистонликнинг ҳалокатига сабаб бўлган фожиа айбдорлари 7 йилгача озодликдан маҳрум этилиши мумкин

Ақтўбеда 52 нафар йўловчиси билан ёниб кетган автобус ҳайдовчиларига давлат қораловчиси 5 йил озодликдан маҳрум этиш жазосини сўради, деб хабар беради «Zakon.kz».

Транспорт компаниясининг механиги ва директори эса етти йилга қамалиши мумкин.

30 октябрь куни жиноят ишлари бўйича ихтисослашган туманлараро судида иш бўйича тинглов бўлиб ўтди.

Судда давлат қораловчиси Осман Ўринбосар ўғли автобуснинг уч нафар ҳайдовчиси Барат Танатов, Максат Пернебеков ва Нуржан Қирғизбоевларни Қозоғистон республикаси жиноят кодексининг 292, 345-моддаларига кўра айбдор деб топилишини ва уларга нисбатан беш йил муддатга озодликдан, 7 йилга ҳайдовчилик гувоҳномасидан маҳрум этиш жазосини тайинлашни, шунингдек йўловчи ташиш соҳасида ишлаш ҳуқуқидан маҳрум этишни сўраган.

«Азиатранзитсервис» корхонаси директори Нурлибек Тлепбаев ва механиги Баҳодир Пардабоевларни эса прокурор жиноят кодексининг 254, 348, 384-моддалари бўйича айбдор деб топди ҳамда уларга нисбатан етти йилга озодликдан маҳрум этиш, раҳбарлик лавозимларида ишлаш ҳуқуқидан маҳрум этиш ва беш йил давомида йўловчи ташиш соҳасида фаолият юритиш ҳуқуқини  тақиқлаш жазосини сўради.