2018 йилнинг 3 октябрь куни Самарқанд вилояти Каттақўрғон тумани ИИБ ходимлари томонидан ўтказилган тезкор тадбир давомида 1987 йилда туғилган Каттақўрғон тумани «Силпан» қишлоғида яшовчи С.Д. ўзининг яшаб турган хонадонининг ёрдамчи хўжаликларида пахта хом ашёсидан чигитни ажратадиган қўлбола ускунасидан пахта ишлаб чиқараётганлиги аниқланган. Бу ҳақда «Дарё» мухбири Фарҳод Норбўтаев хабар бермоқда.
Вилоят Ички ишлар бошқармаси матбуот хизмати раҳбари Ширин Норматова берган маълумотга кўра фуқаро С.Д.нинг ноқонуний цехидан 320 килограмм той пахта, 2860 килограмм пахта хом ашёси, бир дона пахта титиш ускунаси далилий ашё сифатида тегишли тартибда ҳужжатлаштириб олинган.
Тезкор суриштирув натижасида 1973 йилда Самарқанд вилоятида туғилган, «Азаматли Рустам даласи» фермер хўжалиги раиси, Иштихон тумани «Оқчироқоси» қишлоғи Янгиобод қўчасида яшовчи Х.Р. ўзининг хўжалигида етиштирган пахта хом ашёсини ҳар бир килограмини 2000 сўмдан сотганлиги маълум бўлган.
Ҳолат юзасидан Қаттақўрғон туман ИИБ тергов бўлими томонидан Х.Р.га нисбатан дастлабки ҳужжатлар расмийлаштирилиб, Маъмурий ишлар бўйича Каттақўрғон туман суди томонидан Ўзбекистон Республикаси Маъмурий Жавобгарлик тўғрисидаги Кодекснинг 183, 194-моддаларига кўра фуқаро С.Д.га ўн сутка қамоқ жазоси тайинланди.
Шунингдек, жорий йилнинг 12 октябрь куни Самарқанд вилояти Нарпай тумани ИИБ ходимлари томонидан ўтказилган тезкор тадбир давомида, 1983 йилда Самарқанд вилоятида туғилган, Нарпай тумани «Тинчлик» маҳалласида яшовчи О.Ш. ўзининг яшаш уйида қўлбола усулда ясалган пахтани чигитидан ажратувчи мосламасини, тегишли тартибда давлат рўйхатидан ўтказмасдан ноқонуний ишлатаётганлиги аникланган. О.Ш.нинг яшаш уйида бир дона қўлбола усулда ясалган «жин» мосламаси, 90 килограмм чигит, 33 килограмм пахта толаси ашёвий далил сифатида ҳужжатлаштириб олинган.
Ҳолат юзасидан Нарпай туман ИИБ томонидан О.Ш.га нисбатан дастлабки ҳужжатлар расмийлаштирилиб, суриштирув ишлари олиб борилмоқда.
Изоҳ (0)