O‘zbekiston Respublikasi Prezidentining “Fuqarolarni ijtimoiy qo‘llab-quvvatlash bo‘yicha qo‘shimcha chora-tadbirlar hamda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha bir martalik umumdavlat aksiyasini o‘tkazish to‘g‘risida” 2018-yil 20-apreldagi PF-5421-son Farmoni asosida fuqarolar tomonidan o‘zboshimchalik bilan egallab olingan yer uchastkalari yoki ruxsatnoma olmay qurilgan turar joylarga nisbatan mulk huquqini olish davlat xizmatlari markazlari va ko‘chmas mulkka nisbatan huquqni e’tirof etish tuman (shahar) komissiyalari tomonidan amalga oshiriladi.
Afsuski, Samarqand viloyatida mazkur yo‘nalish bo‘yicha aynan komissiya a’zolari mukammal va sifatli faoliyat ko‘rsatmayapti. Ayrimlarida hatto o‘zaro hujjat almashinuvi yo‘lga qo‘yilmagan. Oqibatda murojaatlar javobsiz qolib, ijro intizomi buzilmoqda. Bu esa fuqarolarning qabul qilingan farmon va qarorlarga nisbatan ishonchsizligiga olib kelmoqda, deydi “Daryo” muxbiri Farhod Norbo‘tayev.
Mazkur aksiya e’lon qilinidan buyon bugungi kunga qadar Samarqand viloyati tuman (shahar) Davlat xizmatlari markazlariga jami 4224 ta murojaat kelib tushgan. Shulardan bor yo‘g‘i 511 tasiga mulk huquqini e’tirof etish bo‘yicha tuman (shahar) hokimlari tomonidan qaror chiqarilgan. Jumladan, Samarqand shahrida 79 ta, Oqdaryo tumanida 172 ta, Pastdarg‘om tumanida 10 ta, Paxtachi tumanida 22 ta, Urgut tumanida 30 ta, Ishtixon tumanida 28 ta, Narpay tumanida 5 ta, Jomboy tumanida 33 ta, Nurobod tumanida 38 ta, Kattaqo‘rg‘on shahrida 25 ta, Qo‘shrabot tumanida 25 ta, Tayloq tumanida 1 ta, Samarqand tumanida 12 ta, Kattaqo‘rg‘on tumanida 3 ta, Payariq tumanida 5 ta va Bulung‘ur tumanida 23 ta murojaat ijobiy hal qilingan.
Murojaatlarning 585 tasi rad etilgan bo‘lib, aksariyat murojaatlarning ijro muddatlari buzilgan. Bu esa ushbu jarayonnig eng og‘riqli nuqtasi hisoblanadi.
“O‘tkazilgan o‘rganishlar hamda “Kadastr 2.0” tizimidan olingan ma’lumotlar tahlili shuni ko‘rsatmoqdaki, umumdavlat aksiyasi doirasida tashkil etilgan komissiya ishchi organiga komissiya a’zolari tomonidan ko‘chmas mulk obyekti bo‘yicha o‘z xulosalarini belgilangan muddat mobaynida taqdim qilmay, qator qonun buzilishi holatlariga yo‘l qo‘yib kelinmoqda. Jumladan, Samarqand shahar davlat soliq inspeksiyasi 727 ta, Urgut tuman DSI 76 ta, Kattaqo‘rg‘on tuman DSI 36 ta, Oqdaryo tuman DSI 35ta, Narpay tuman DSI 9 ta, Paxtachi tuman DSI 25 ta, Kattaqo‘rg‘on shahar DSI 15 ta, Tayloq tuman DSI7 ta holatda qonun buzilishiga yo‘l qo‘ygan”, — deydi Davlat xizmatlari agentligi Samarqand viloyat boshqarmasi xodimi A.Pirimov.
Umumdavlat aksiyasi doirasida qator qonun buzilishi holatlariga, murojatlarning ijro muddatini buzilishiga yo‘l qo‘yishlik, o‘zlariga yuklatilgan vazifalarni to‘liq ijro etmaslik, asossiz ravishda murojaatlarni ko‘rib chiqish muddatlariga rioya etmaslik holatlari viloyat Ichki ishlar boshqarmasining tuman va shahar bo‘limlari ham borligi masalaning nechog‘lik og‘riqli ekanligidan dalolatdir.
Xususan, birgina Samarqand shahar IIB 116 ta, Kattaqo‘rg‘on shahar IIB 62 ta, viloyat IIB Yong‘in xavfsizligi boshqarmasi 33 ta, Payariq tuman IIB Yongin xavfsizligi boshqarmasi 64 ta, Urgut uman IIB 84 ta va tuman IIB YOXB 64 ta, Kattaqo‘rg‘on tuman IIB 33 ta, Pastdarg‘om tuman IIB YOXB 12 ta, Oqdaryo tuman IIB 61 ta, Tayloq tuman IIB 30 ta va tuman IIB YOXB 3 ta, Narpay tuman IIB 42 ta, Paxtachi tuman IIB 72 ta murojaatga e’tiborsiz qarab kelgan.
Shuningdek, Samarqand shahar Arxitektura boshqarmasi 235 ta, Kattaqo‘rg‘on shahar arxitektura boshqarmasi 24 ta, Payariq tuman Arxitektura boshqarmasi 43 ta, Kattaqo‘rg‘on tuman DSENM 23 ta, Urgut tuman DSENM 51 ta, Narpay tuman DSENM 60 ta, Payariq tuman DSENM 64 ta, Pastdarg‘om tuman DSENM 19 ta Paxtachi tumanDSENM 30 ta, Urgut tuman Ekologiya va atrof muxitni muxofaza qilish inspeksiyasi 78 ta, Payariq tuman Ekologiya va atrof muxitni muxofaza qilish inspeksiyasi 82 ta, Oqdaryo tuman Ekologiya va atrof muhitni muxofaza qilish inspeksiyasi 35 ta holat qayd etilgan.
“Bugungi kunda qonun buzilish holatlariga yo‘l qo‘ygan 15 nafar komissiya a’zolari va ularning mas’ul xodimlari ma’muriy javobgarlikka tortilgan. Bu boradagi ishlar boshqarma tomonidan muntazam ravishda amalga oshirilib borilmoqda. Biroq, shuni alohida ta’kidlash joizki, toki quyi tizimdagi mas’ul idoralar qabul qilinayotgan normativ-huquqiy hujjatlarning mazmun-mohiyatini to‘liq anglab ijrosini sifatli qilib ta’minlamas ekan bu hujjatlar shunchaki qog‘ozda qolib ketaveradi”, — deydi Davlat xizmatlari agentligi Samarqand viloyat boshqarmasi xodimi A.Pirimov.
Izoh (0)