Қашқадарё вилояти жиноят ишлари бўйича Чироқчи туман судида босқинчилик жиноятини содир этган фуқароларга нисбатан ҳукм ўқилди. Бу ҳақда суд матбуот хизмати «Дарё» га хабар берди.
Жалил Дўсматов (исм-фамилияси ўзгартирилган) 24 ёшда бўлиб, моддий томондан қийинчилик кўрмасдан улғайди. Эндигина уйланиш, оила қуриш ёшида эди. Шу йилнинг март ойида уйига меҳмонга келган отасининг ўртоғи Зафар Рахимов ўзига тегишли бўлган ерни сотгани ҳақида эшитиб, фикри-хаёли бўлинди. Ерни сотишдан олган пулларни қандай қилиб бўлса ҳам қўлга киритиш пайига тушиб қолади.
Бироқ, бу иш унинг ўзи учун хатарли эди, чунки уни таниб қолишлари мумкин эди. Шу сабабли Жалил Дўсматов ўзига жиноий шерик топишга ҳаракат қила бошлади. «Кўр кўрни қоронғуда топади» деганларидек, Жалил Дўсматов қўшни қишлоқда яшовчи Мурод Шокиров билан учрашиб, ўз ниятини баён қилади. Унинг таклифи Мурод Шокировга ҳам маъқул келади. Икки «дўст» ўзларига яна бир бу борада тажрибаси бор, куч-қувватли шерик ахтара бошлашади ва илгари ўғирлик жиноятини содир қилиб, ушбу жинояти очилмасдан қолгани сабабли текин даромадга ўрганган Дурбек Азизов билан топишишади. Ана энди уч олғир йигитлар Зафар Рахимовнинг уйига кечаси кириш ва ерни сотишдан олган пулларни қўлга киритиш режасини тузишади.
Ўзаро режага кўра, қўлқоп, ниқоб, скочт ўрами ва пичоқ билан қуролланиб, тунги вақт соат 01:30 ларда Зафар Рахимовни уйига бостириб киришади. Уларнинг режаси амалга ошиб, шу куни уй эгаси Рахимов иш билан кетган, уйда унинг турмуш ўртоғи ва вояга етмаган жияни ёлғиз қолган эди.
Мақола «қаҳрамонлари» Зафар Рахимовнинг турмуш ўртоғи Ойниса Холиқованинг ёлғиз эканлигидан фойдаланиб, уни қўрқитиб, ҳаётига хавф солиб, ерни сотишдан олган пулларни топиб беришни талаб қилишади. Ярим тунда қуролланган ва ниқоб таққанган ҳолда уйига бостириб кирган босқинчиларнинг авзойидан қўрққан Ойниса Холиқова уйда турган сейфни очиб беришга мажбур бўлади. Йигитлар сейф ичидан 500 АҚШ доллари ва Ойниса Холиқовага тегишли бўлган 13 миллион сўмдан зиёд турли тилла тақинчоқларни қўлга киритиб, Ойниса Холиқанинг қўлини ва оғзини скочт билан боғлаб, ярим соат уйдан чиқмасдан туришни, акс ҳолда уйни ёқиб юборишларини айтиб, воқеа жойидан яширинишган.
Бироқ, «Бузоқнинг қочгани сомонхонагача» деганларидек, улар томонидан содир қилинган босқинчилик жинояти ҳуқуқни муҳофаза қилувчи орган ходимларининг тезкор ҳаракатлари натижасида ўз вақтида фош қилинди.
Тергов-суриштирув давомида Дурбек Азизовнинг илгари содир қилган ўғирлик жиноятини ҳам содир қилгани, ўзганинг 22 миллион сўмдан ортиқ мулкини ўғирлик йўли билан талон-торож қилиб, ўз эҳтиёжларига ишлатиб юборилгани ҳам аниқланди
Жиноят ишлари бўйича Чироқчи туман судида (раислик қилувчи судья Ш.Бахтиёров) мазкур жиноят иши очиқ суд мажлисида ҳар томонлама кўриб чиқилди. Судланувчилар Жалил Дўсматов, Мурод Шокиров ва Дурбек Азизовлар Ўзбекистон Республикаси Жиноят кодекси 164-моддаси 3-қисмининг «в» банди (босқинчилик, яъни ўзганинг мол-мулкини талон-торож қилиш мақсадида, уй-жойга ғайриқонуний равишда кириб, ҳаёт ёки соғлиқ учун хавфли бўлган зўрлик ишлатиш) билан айбдор деб топилдилар. Уларнинг айбларига иқрор ва пушаймонликлари, жабрланувчининг даъвоси йўқлиги, ёшликлари, яшаш жойлардан ижобий тавсифланганликлари ва берилган кафиллик хатлари инобатга олиниб, Жалил Дўстамов ва Мурод Шокировларгва Ўзбекистон Республикаси ЖКнинг 57-моддаси (енгилроқ жазо тайинлаш) қўлланган ҳолда 6 йилдан, Дурбек Азизовга эса ЖКнинг 59-моддаси тартибида, 7 йил муддатга озодликдан маҳрум қилиш жазоси тайинланди.
Бундан ташқари, жиноятнинг сабаблари ва унинг содир этилишига имкон берган шарт-шароитлар аниқланиб, уларни бартараф этиш чораларини кўриш юзасидан хусусий ажрим чиқарилиб, маҳалла, ИИБ ва ёшлар иштирокида муҳокама қилиш туман ҳокимлиги эътиборига ҳавола қилинди.
Изоҳ (0)