Qashqadaryo viloyati jinoyat ishlari bo‘yicha Chiroqchi tuman sudida bosqinchilik jinoyatini sodir etgan fuqarolarga nisbatan hukm o‘qildi. Bu haqda sud matbuot xizmati “Daryo” ga xabar berdi.
Jalil Do‘smatov (ism-familiyasi o‘zgartirilgan) 24 yoshda bo‘lib, moddiy tomondan qiyinchilik ko‘rmasdan ulg‘aydi. Endigina uylanish, oila qurish yoshida edi. Shu yilning mart oyida uyiga mehmonga kelgan otasining o‘rtog‘i Zafar Raximov o‘ziga tegishli bo‘lgan yerni sotgani haqida eshitib, fikri-xayoli bo‘lindi. Yerni sotishdan olgan pullarni qanday qilib bo‘lsa ham qo‘lga kiritish payiga tushib qoladi.
Biroq, bu ish uning o‘zi uchun xatarli edi, chunki uni tanib qolishlari mumkin edi. Shu sababli Jalil Do‘smatov o‘ziga jinoiy sherik topishga harakat qila boshladi. “Ko‘r ko‘rni qorong‘uda topadi” deganlaridek, Jalil Do‘smatov qo‘shni qishloqda yashovchi Murod Shokirov bilan uchrashib, o‘z niyatini bayon qiladi. Uning taklifi Murod Shokirovga ham ma’qul keladi. Ikki “do‘st” o‘zlariga yana bir bu borada tajribasi bor, kuch-quvvatli sherik axtara boshlashadi va ilgari o‘g‘irlik jinoyatini sodir qilib, ushbu jinoyati ochilmasdan qolgani sababli tekin daromadga o‘rgangan Durbek Azizov bilan topishishadi. Ana endi uch olg‘ir yigitlar Zafar Raximovning uyiga kechasi kirish va yerni sotishdan olgan pullarni qo‘lga kiritish rejasini tuzishadi.
O‘zaro rejaga ko‘ra, qo‘lqop, niqob, skocht o‘rami va pichoq bilan qurollanib, tungi vaqt soat 01:30 larda Zafar Raximovni uyiga bostirib kirishadi. Ularning rejasi amalga oshib, shu kuni uy egasi Raximov ish bilan ketgan, uyda uning turmush o‘rtog‘i va voyaga yetmagan jiyani yolg‘iz qolgan edi.
Maqola “qahramonlari” Zafar Raximovning turmush o‘rtog‘i Oynisa Xoliqovaning yolg‘iz ekanligidan foydalanib, uni qo‘rqitib, hayotiga xavf solib, yerni sotishdan olgan pullarni topib berishni talab qilishadi. Yarim tunda qurollangan va niqob taqqangan holda uyiga bostirib kirgan bosqinchilarning avzoyidan qo‘rqqan Oynisa Xoliqova uyda turgan seyfni ochib berishga majbur bo‘ladi. Yigitlar seyf ichidan 500 AQSh dollari va Oynisa Xoliqovaga tegishli bo‘lgan 13 million so‘mdan ziyod turli tilla taqinchoqlarni qo‘lga kiritib, Oynisa Xoliqaning qo‘lini va og‘zini skocht bilan bog‘lab, yarim soat uydan chiqmasdan turishni, aks holda uyni yoqib yuborishlarini aytib, voqea joyidan yashirinishgan.
Biroq, “Buzoqning qochgani somonxonagacha” deganlaridek, ular tomonidan sodir qilingan bosqinchilik jinoyati huquqni muhofaza qiluvchi organ xodimlarining tezkor harakatlari natijasida o‘z vaqtida fosh qilindi.
Tergov-surishtiruv davomida Durbek Azizovning ilgari sodir qilgan o‘g‘irlik jinoyatini ham sodir qilgani, o‘zganing 22 million so‘mdan ortiq mulkini o‘g‘irlik yo‘li bilan talon-toroj qilib, o‘z ehtiyojlariga ishlatib yuborilgani ham aniqlandi
Jinoyat ishlari bo‘yicha Chiroqchi tuman sudida (raislik qiluvchi sudya Sh.Baxtiyorov) mazkur jinoyat ishi ochiq sud majlisida har tomonlama ko‘rib chiqildi. Sudlanuvchilar Jalil Do‘smatov, Murod Shokirov va Durbek Azizovlar O‘zbekiston Respublikasi Jinoyat kodeksi 164-moddasi 3-qismining “v” bandi (bosqinchilik, ya’ni o‘zganing mol-mulkini talon-toroj qilish maqsadida, uy-joyga g‘ayriqonuniy ravishda kirib, hayot yoki sog‘liq uchun xavfli bo‘lgan zo‘rlik ishlatish) bilan aybdor deb topildilar. Ularning ayblariga iqror va pushaymonliklari, jabrlanuvchining da’vosi yo‘qligi, yoshliklari, yashash joylardan ijobiy tavsiflanganliklari va berilgan kafillik xatlari inobatga olinib, Jalil Do‘stamov va Murod Shokirovlargva O‘zbekiston Respublikasi JKning 57-moddasi (yengilroq jazo tayinlash) qo‘llangan holda 6 yildan, Durbek Azizovga esa JKning 59-moddasi tartibida, 7 yil muddatga ozodlikdan mahrum qilish jazosi tayinlandi.
Bundan tashqari, jinoyatning sabablari va uning sodir etilishiga imkon bergan shart-sharoitlar aniqlanib, ularni bartaraf etish choralarini ko‘rish yuzasidan xususiy ajrim chiqarilib, mahalla, IIB va yoshlar ishtirokida muhokama qilish tuman hokimligi e’tiboriga havola qilindi.
Izoh (0)