Тошкентдаги Шоштепа археологик ёдгорлиги эътиборталаб ҳудудга айланиб бормоқда (видео)

Тошкентнинг Юнусобод туманида жойлашган Шоштепа археологик ёдгорлиги тарихий манбаларда IV-VIII асрларга оидлиги қайд этилади, деб ёзади ЎзА.

Айни вақтда давлат муҳофазасига олинган бу тепалик эътиборталаб ҳудудга айланиб бормоқда.

Бу тарихий тепалик қадимги Тошкент хавфсизлигини асраш учун муҳим қўрғонлардан бири ҳисобланган. Баланд тепаликнинг уч томони чуқур ҳандақлар билан ўралгани боис, у ҳарбий истеҳком вазифасини ўтаган. Обиданинг майдони бир пайтлар 30 гектар, узунлиги эса 300 метрни ташкил қилган.

Бу ердаги қисқа муддатли археологик қазишма ишларига гувоҳ бўлганларнинг сўзларига кўра, қароргоҳ вазифасини ўтаган тепаликдаги бино йирик деворлардан иборат бўлган. Бу тепаликдан ўқ-ёй қолдиқлари, турли ишларда фойдаланиш мумкин бўлган сопол буюмлар топилган.

Тошкент шаҳрининг тарихи айнан шу тепаликдан бошланишини эътиборга олсак, бу обиданинг ўтмиши ва аҳамияти жуда муҳим. Шундай узоқ тарихга эга тепалик бугун қаровсиз аҳволда. Эътиборсизлик натижасида тепалик борган сари нураб боряпти. Бугун унинг ҳудуди 2—3 сотих келади, холос.

Ўзбекистон «Миллий тикланиш« демократик партияси томонидан ҳудудлардаги тарихий ва маданий мерос объектларини инвентаризация қилиш ҳамда уларнинг бугунги ҳолатини ўрганиш юзасидан амалий саъй-ҳаракатлар олиб борилмоқда. Партиянинг Тошкент шаҳар кенгаши ҳам бу каби хайрли ишлар натижасини умумлаштириб, айрим маданий объектларнинг бугунги ачинарли аҳволи юзасидан керакли ташкилотларга маълумотлар бермоқда.

«Тарихимизни сақлаб қолиш, келажак авлодга биз, буюк тарихга эга эканлигимизни кўрсатиш учун бу каби маданий объектларни асрашга эътиборлироқ бўлишимиз лозим. Ушбу тепаликда маҳаллий аҳоли вакиллари мунтазам ободонлаштириш ишларини олиб боради. Аммо бунинг ўзи етарли эмас», — дейилади хабарда.

Ўзбекистон Республикасининг «Маданий мерос объектларини муҳофаза қилиш ва улардан фойдаланиш тўғрисида«ги қонунида «Тарихий манзилгоҳ ҳудуди доирасида шаҳарсозлик, хўжалик фаолияти ва бошқа фаолият моддий маданий мерос объектлари ва мазкур манзилгоҳнинг бошқа қимматли хусусиятларини сақлаб қолиш шарти билан амалга оширилмоғи лозим«, деб белгилаб қўйилган.

Бу ерда кўп қаватли уйлар, хизмат кўрсатиш объектлари ва кичик саноат корхоналарининг қурилиши обида ҳудудининг кичрайиб кетишига олиб келмоқда. Лоқайд одамлар огоҳлантиришларга қарамай, тепалик атрофига ҳамон маиший чиқиндиларни ташлаб кетмоқда.

Йўқолиб бораётган бу маданий объект ҳали ўрганиш ва тадқиқотларга муҳтож. Уни асраб қолиш ва авлодларга етказиш учун бугун ҳаракат бошлаш керак.