Наманган муҳандислик-технология институти Саратов техника университетининг Энгельс технология институти билан ҳамкорликда қўшма дастур асосида талабалар тайёрлашни йўлга қўймоқда. Бу ҳақда «Дарё»га институт матбуот хизмати хабар берди.
Икки давлат олий таълим муассасалари раҳбарияти келишувига кўра, кимёвий технология, технологик машина ва жиҳозлар, технологик жараёнлар ва ишлаб чиқаришни автоматлаштириш ҳамда бошқариш йўналишларида талабалар қабули амалга оширилди. Қўшма дастурда инеграциялашган дастур орқали 2+2 кўринишида ўқиш (талабалар икки йил Ўзбекистонда, шунча муддат Россияда таҳсил олади) ва унинг якуни бўйича икки томонлама тан олинадиган диплом берилиши кўзда тутилган.
Учта қўшма таълим йўналишининг ҳар бирига 20 тадан қабул квотаси ажратилган бўлиб, уларда 60 нафар талаба таҳсил олади.
Яқинда институтга қўшма дастур синов имтиҳонларини қабул қилиш учунЕнгелс технология институти профессори Марина Кардаш келди. У режалаштирилган ишларни бажариш асносида талаба ва профессор-ўқитувчилар учун мастер-класс ўтиб берди. Икки олийгоҳ ҳамкорлик шартномалари ишлаб чиқилди ва тасдиқланди.
Маълумот учун, Наманган муҳандислик-технология институтида Россия, Малайзия, Жанубий Корея, Италия, Португалия каби ўнга яқин хорижий давлат етакчи олий таълим муассалари ҳамда илмий тадқиқот марказлари билан ҳамкорлик алоқалари йўлга қўйилган.
Изоҳ (0)