Инновацион ривожланиш вазирлигида Туркиянинг Agrobest корхонаси раҳбари Эроглу Фаруни билан учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
Инновацион ривожланиш вазири Иброҳим Абдураҳмонов раҳбарлигидаги делегациянинг 16—20-сентябр кунлари пахтачилик ва томчилаб суғориш тизимидан фойдаланиш масалаларида Туркияга сафари чоғидаги тадбирлар натижасида юзага келган илиқ дўстона муносабатлар туфайли бугунги кунда Ўзбекистонда яна бир хорижий сармояли корхона — уруғчилик кластерини тузиш ғояси пайдо бўлди. Аввал Тошкент вилоятида тузилажак кластер кейинчалик мамлакатнинг бошқа ҳудудларида ҳам ташкил этилиши мумкинлиги ҳам муҳокама қилинди.
Томонлар кластерни тузиш бўйича ишларни тез суръатлар билан олиб бориш зарурлигини таъкидлар экан, уруғчилик бизнесининг ўзига хос жиҳатларини эътиборга олганда бу масалада бир ойлик кечикиш ишнинг яна бир йилга ортга сурилишига сабаб бўлишини айтди. Эроглу Фаруни ноябрь ойининг бошларидаёқ Тошкентга уруғчилик соҳасида катта тажрибага эга мутахассис Рашид Ўтлук келишиини айтди. И. Абдураҳмонов ўз навбатида ҳамкорликдаги кластер тузиш масаласида барча шароитларни яратиб беришга тайёрлиги, жумладан, ташкилотнинг ҳуқуқий жиҳатдан расмийлаштириш, ер масаласини ҳал қилиш ишларига ўзи бош-қош бўлишини билдирди.
Янги ташкил этиладиган уруғчилик кластери нафақат уруғ етиштириш, балки уларни ташқи муҳит таъсири ва зараркундалардан ҳимоя қилиш учун дорилаш, сақлаш, қадоқлаш ишлари билан ҳам шуғулланади.
Изоҳ (0)