12 октябрь куни Тошкентдаги Ўзбекистон халқаро форумлар саройида Мустақил Давлатлар Ҳамдўстлигига аъзо мамлакатлар Мудофаа вазирлари кенашининг навбатдаги йиғилиши бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Унда Россия, Озарбайжон, Арманистон, Беларусь, Қозоғистон, Қирғизистон, Тожикистон ва Ўзбекистон республикаларининг мудофаа идоралари раҳбарлари иштирок этди.
Ўзбекистон мудофаа вазири генерал-майор Абдусалом Азизов ўз нутқида барча йиғилиш иштирокчиларини қутлаб, глобал хавф ва таҳдидлар кучайган бир вақтда Кенгашнинг муҳим аҳамиятга эга эканлигини ўз тасдиғини топаётганини таъкидлаб, Кенгаш кўп томонлама ҳарбий ҳамкорликнинг кенгайиши учун муҳим платформа эганлигига ишонч билдирди.
«МДҲга аъзо мамлакатлар Мудофаа вазирлари кенгаши ўз фаолияти давомида кўп томонлама ҳарбий ҳамкорликни таъминловчи, ҳарбий сиёсат ва ҳарбий қурилиш, ҳарбий можароларни бартараф этишга қаратилган таклифларни ишлаб чиқадиган амалий орган сифатида шаклланиб улгурди.
Бугунги учрашувимиз ўсиб бораётган геосиёсий танглик, тобора радикаллашаётган ва кучайиб бораётган диний фанатизм, яқин ва узоқдаги қўшниларимизда можароли вазиятлар юзага келаётган бир вақтда бўлиб ўтмоқда.
Ҳамдўстликка аъзо мамлакатлар Мудофаа вазирлари кенгашининг формати миллий ва умумий қарашларни ҳисобга олган ҳолда ўзаро алоқалар диапазонини кенгайтириш имконини беришини инобатга олиб, Ўзбекистон мазкур коллектив органи фаолиятида иштирок этишга алоҳида эътибор қаратмоқда», – деди Абдусалом Азизов.
Йиғилиш давомида Марказий Осиёдаги вазият, халқаро терроризмга қарши курашиш йўлидаги устувор вазифалар, Ҳамдўстликка аъзо мамлакатлар ўртасида ҳарбий ҳамкорликни ривожлантириш, радиацион, кимёвий ва билогик вазиятни баҳолаш ҳамда назорат қилишда Бирлашган тизимнинг истиқболлари муҳокама қилинди.
Шунингдек, МДҲга аъзо мамлакатлар қуролли кучлари авиация парвозлари соҳасида ҳамкорлик масалалари, Ягона давлат радиолокацион идентификация тизимини амалга ошириш, ҳарбий таълим соҳасида ҳарбий билим юртлари курсантлари ўртасида фан олимпиадаларини ўтказиш, Иккинчи Жаҳон урушининг 75 йиллигига бағишланган қўшма тадбирларни ҳамкорликда амалга ошириш масалалари кўриб чиқилди.
Бундан ташқари кенгаш аъзолари Мудофаа вазирлари кенашининг 2019 йил бўйича иш режасини қабул қилди, МДҲга аъзо мамлакатлар қуролли кучларининг ҳамкорликдаги (бирлашган) алоқа тизимини ривожлантиришга, 2022 йилга қадар қуролли кучлар фаолиятининг дастурий таъминоти, навигация, метрология, топография ва геодезия соҳасида ҳамкорликни ташкил этиш, 2019 йил давомида МДҲга аъзо давлатлар Ҳаво ҳужумидан мудофаа ва ҳарбий ҳаво кучлари қўшинлари қўмондонликлари ўртасида қўшма машғулотларни ташкил этишга йўналтирилган ҳужжатлар имзоланди.
Йиғилишга Россиянинг мудофаа вазири армия генерали Сергей Шойгу раислик қилди.
Изоҳ (0)