2018 йил 10 октябрь куни Германиянинг Франкфурт шаҳрида анъанавий Frankfurt Buchmesse халқаро китоб кўргазмасининг тантанали очилиш маросими ГФР президенти Франк-Вальтер Штайнмайер, дипломатик корпус вакиллари, элчилар, шунингдек, кўплаб хорижий давлатлардан ташриф буюрган ношир ва матбаачилар иштирокида бўлиб ўтди. Бу ҳақда Ўзбекистон Матбуот ва ахборот агентлиги хабар бермоқда.
Мазкур йирик маърифий фестивалда Ўзбекистонда фаолият юритаётган етакчи нашриёт-матбаа корхоналаридан таркиб топган Ўзбекистон матбуот ва ахборот агентлиги бошчилигидаги Ўзбекистон делегацияси ноширлар ҳамда матбаачилар эришган ютуқлари акс этган тақдимотлар билан қатнашмоқда.
— Кўргазмада Ўзбекистон Матбуот ва ахборот агентлиги тизимидаги «Ўзбекистон», «Ўқитувчи», Ғафур Ғулом, Чўлпон номидаги нашриёт-матбаа ижодий уйлари, «Ўзбекистон Миллий энциклопедияси» давлат илмий нашриёти, «Шарқ» нашриёт-матбаа акциядорлик компанияси, «Янги аср авлоди» нашриёт-матбаа маркази, «Маънавият» нашриёт-матбаа уйининг 500 га яқин Ўзбекистоннинг турли соҳаларда эришаётган ютуқлари акс эттирилган китоб-альбомлар, ижтимоий-сиёсий, маданий-маърифий, илмий-оммабоп, болалар адабиёти ва бадиий асарлари намойиш этилаётир, — дейди ЎзМАА Бош директори, Ўзбекистон делегацияси раҳбари Лазиз Тангриев. — Мазкур тадбирда иштирок этишдан кўзланган мақсад Ўзбекистоннинг ноширлик ва матбаачилик соҳасидаги ютуқлари, нашриётларнинг матбаа маҳсулотларини Европа мамлакатларида тарғиботини ташкил этиш, маҳсулот экспортини йўлга қўйиш, ушбу йўналишда жаҳоннинг илғор тажрибаларини ўрганиш ва ҳаётга татбиқ этишдир.
Ўзбекистон делегацияси вакиллари кўргазмада самарали иштирок этмоқда. Хусусан, ўзбек ноширлари Россиянинг «Фламинго», Польшанинг Book institute, Эроннинг «Шаҳрестан», Бельгиянинг Caramel, Буюк Британиянинг Account executive, Sweet Cherry Publishing, Австриянинг TBC global, Қатарнинг Lusail сингари ўнлаб нашриётлар билан китоб маҳсулотларини чоп этиш юзасидан муаллифлик ҳуқуқини сотиш, сотиб олиш ва таржима қилиш бўйича қатор келишувларга эришди.
Frankfurt Buchmesse халқаро китоб кўргазмаси 14 октябрга қадар давом этади.
Изоҳ (0)