Ўзбекистонда 12—18 ноябрь кунлари «Глобал тадбиркорлик ҳафталиги» (Global Entrepreneurship Week) ўтказилади. Ёшлар иттифоқи Марказий кенгашида мазкур тадбирга бағишланган матбуот анжумани бўлиб ўтди. Бу ҳақда «Дарё»га Ёшлар медиа маркази маълум қилди.
Матбуот анжуманида таъкидланганидек, «Глобал тадбиркорлик ҳафталиги» Ўзбекистон мамлакатга хорижий инвестицияларни жалб қилиш, чет эл тадбиркорларини Ўзбекистондаги ишбилармонлик муҳити билан яқиндан таништириш, тадбиркорлар ўртасида ўзаро ҳамкорлик муносабатларини мустаҳкамлашда муҳим тадбирга айланмоқда.
Тадбиркорлик ҳафталиги доирасида Тошкент шаҳри ва Бухоро, Самарқанд, Қашқадарё вилоятларида махсус бизнес-тренинглар, тақдимотлар, маҳорат дарслари, B2B учрашувлар ташкил этиш белгиланган. Шунингдек, республиканинг барча ҳудудларида ёш тадбиркорлар бизнес-форуми ташкил этилади.
«Глобал тадбиркорлик ҳафталиги»ни ўтказишдан асосий мақсад муваффақиятга эришган тажрибали тадбиркорлар билан ёш тадбиркорлар ўртасида ўзаро ҳамкорлик муносабатларини шакллантириш, ёшлар орасида бизнес юритиш маданиятини шакллантириш, уларни бизнесни ривожлантиришда қўл келадиган илғор тажриба ва замонавий воситалар билан таништириш ҳамда Ўзбекистонда тадбиркорликни янада ривожлантиришга қаратилган таклифларни ишлаб чиқиш ва амалиётга татбиқ этишдан иборат.
Тадбирда хорижлик инвесторлар ва бизнес тренерлар иштироки кутилмоқда. Жумладан, америкалик коучинг соҳасида етакчи мутахассис Жон Кинг ва бизнесни бошқариш бўйича халқаро мутахассис Исхак Адизас, россиялик IT инвестори Леонид Богуславский ва бошқаларнинг келиши режалаштирилган.
Изоҳ (0)