Франция Ўзбекистонга сунъий йўлдош сотса, Arianespace орқали уни коинотга учирувчи жойни ҳам таклиф қилиши мумкин. Бу ҳақда Европа истиқбол ва хавфсизлик тадқиқотлари институти президенти Эммануэль Дюпюи «Turon 24» мухбири билан суҳбатда айтиб ўтди.
«Мамлакатингиз 25 йил аввал, мустақилликдан икки йил ўтиб ташлаб қўйилган коинот соҳасидаги салоҳиятини қайта тиклашга қарор қилган. Сиз бу соҳада бошқа бир қатор мамлакатлар каби фаолият олиб бормоқчисиз. Буни Қозоғистонга солиштириш мумкин. Бу биз учун жуда муҳим, чунки бир нечта француз компаниялари, хусусан, Франция—Италия қўшма корхонаси Thales Alenia Space қўшнингиз Туркманистонга 2011 йилда сунъий йўлдош сотган эди. Ўзбекистон ҳам ўз телекоммуникация соҳаси учун сунъий йўлдош қуриш имкониятларини таклиф қилишимизни сўраб мурожаат қилган», дейди ЕIXТИ президенти.
Мутахассиснинг таъкидлашича, одатда сунъий йўлдош сотилганда, уни учириш ҳам Arianespace орқали таклиф қилинади. Лекин йўлдош Россия томонидан таклиф этиладиган шартлар бўйича Бойқўнғир орқали ҳам учирилиши мумкин.
«Бироқ сунъий йўлдош билан уни коинотга учирувчи жойни ҳам таклиф қилишимиз мумкин. Худди шундай таклифни биз 2011 йилда Ашхободга берган эдик», дейди Дюпюи.
Изоҳ (0)