Миллий банк ва Франциянинг Bouygues компанияси туризм соҳасидаги лойиҳаларни амалга ошириш бўйича 100 миллион евролик битимни имзолади. Бу ҳақда банк матбуот хизмати маълум қилди.
Битим «Қадимий Бухоро» туризм ҳудудини қуришни ўз ичига олади.
Лойиҳа 10 гектар ҳудудда меҳмонхоналар, савдо-кўнгилочар маркази, ресторанлар, ҳашаматли турар жой комплекси, ландшафт боғларини барпо қилишни назарда тутади.
Битим доирасида компания лойиҳалаштириш ва қурилишдан ташқари, бу йўналишдаги лойиҳаларни амалга ошириш учун янги инвесторларни излаш ва қурилган объектларни бошқаришда кўмаклашади.
Bouygues Ўзбекистоннинг бошқа туризм шаҳарларида ҳам меҳмонхоналар ва курортлар тизими лойиҳаларини босқичма-босқич амалга оширишни режалаштирган.
Маълумот учун, Bouygues Batiment International SAS Франциянинг 1952 йилда ташкил қилинган йирик қурилиш компанияларидан бири бўлиб, Ла-Манш остидаги тоннел, Дефанс аркаси, Шарл де Голл номидаги аэропортнинг 2-терминали ва бошқа йирик иншоотларни барпо қилган. Компания капитали 25 миллиард еврога тенг, ҳодимлари сони 133 мингдан ортиқ.
Изоҳ (0)