Жорий йилнинг 18 сентябрь куни тунги соат 1 :15 да М-37 халқаро автомагистрал йўлининг 107-километрида, аниқроқ қилиб айтганда, Самарқанд вилоятининг Нарпай тумани «Саловат» маҳалла фуқаролар йиғини Саловат қишлоғи ҳудудида жуда катта ва аянчли кўринишдаги ёнғин содир бўлди. Бу ҳақда «Жамият ва Қонун» газетаси хабар бермоқда.
«Пахтадан саралаб олинган 50 той қимматбаҳо саноат хомашёси белгиланган манзилга етиб бормасдан ёниб, кул бўлди», — дейилади хабарда.
— Халқимизда «ўт балосидан, сув балосидан худо асрасин» деган гап бор, – дейди ўзини Нарпай туман Ёнғин хавфсизлиги инспекториман деб таништирган Бекзод Носиров. — Жиззах текстиль корхонасидан қўшни Туркманистон Республикаси орқали хорижга экспорт учун жўнатилаётган пахта толаси юкланган, магистралда ҳаракатланаётган давлат рақами 70/654 WАА бўлган юк автомашинасининг юкхонасида содир бўлган ёнғин бўйича бизга воқеа жойидан йўл ҳаракати хавфсизлиги ходимлари томонидан хабар келиб тушди. Ёнғинни бартараф этиш бўйича барча чора-тадбирлар амалга оширилди. Лекин, кучли ёнғин сабаб 50 той пахта хом ашёсининг ҳар бир тойи, тахминан, 200 килограммдан келганида, жами 10 тонна қимматбаҳо саноат хом ашёси бир зумда сифатсиз маҳсулотга айланди -қолди. Бу, албатта, аянчли ҳолат.
Айни пайтда ёнғин сабаблари ўрганилмоқда.
Изоҳ (0)