Ўзбекистон Республикаси Бандлик ва меҳнат муносабатлари вазирлиги 2018 йил 28 сентябрь ҳолатига кўра, пахта теримига мажбурий жалб қилиш ҳолатлари бўйича расмий маълумот тақдим этди.
Вазирликнинг «ишонч тармоғи»га мурожаатлар
2018 йил 10 сентябрдан 27 сентябргача бўлган вақт оралиғида Ўзбекистон Республикаси Бандлик ва меҳнат муносабатлари вазирлигининг ишонч тармоқларига пахта теримига мажбурий жалб қилиш ҳолати юзасидан жами 410 та мурожаат келиб тушди. Улардан 228 таси Давлат меҳнат инспекцияси инспекторлари томонидан кўриб чиқилди, 26 тасида қонунбузарлик ҳолати тасдиқланди. 202 та мурожаатда пахта теримига мажбурий жалб қилиш ҳолати тасдиқланмади.
Афсуски, жойларда ҳолатни ўрганиш пайтида мурожаатчилар турли сабаблар таъсирида ўз шикоятларини қайтариб олаётгани кузатилмоқда. Пахта теримига мажбурий жалб қилиш бўйича тасдиқланмаган ҳолатлар юзасидан қайта текширув ишлари ўтказилмоқда.
2018 йил 27 сентябрь ҳолатига кўра ҳудудлар бўйича мурожаатлар йиғма жадвали:
| Қорақалпоғистон | 7 |
| Андижон вилояти | 38 |
| Бухоро вилояти | 19 |
| Жиззах вилояти | 34 |
| Навоий вилояти | 14 |
| Наманган вилояти | 24 |
| Қашқадарё вилояти | 75 |
| Самарқанд вилояти | 13 |
| Сурхондарё вилояти | 29 |
| Сирдарё вилояти | 34 |
| Фарғона вилояти | 21 |
| Хоразм вилояти | 13 |
| Тошкент вилояти | 74 |
| Тошкент ш. | 15 |
| Жами | 410 |
Ижтимоий тармоқларда кенг муҳокамага сабаб бўлган Андижон вилояти Қўрғонтепа тумани Ёшлар иттифоқи фаоли Н.Мирзақобуловнинг туманда жойлашган 53 та мактабдаги ёшлар ташкилоти фаолларини пахта теримига мажбурлаш ҳолати Андижон вилояти прокуратураси ва Давлат меҳнат инспекциясининг биргаликда олиб борган текширув-тергов ишлари билан якунланди. Мажбурлаш ҳолати бўйича Н.Мирзақобулов маъмурий жавобгарликка ва Маъмурий жавобгарлик тўғрисидаги кодексининг 51-моддасига мувофиқ жаримага тортилди.
10 сентябрдан буён 26 та ҳолат бўйича мансабдор шахслар маъмурий жавобгарликка тортилди.
Қонунбузарлик содир этгани учун Давлат меҳнат инспекцияси томонидан Ўзбекистон Республикаси Маъмурий жавобгарлик тўғрисидаги кодекснинг 51-моддаси бўйича қуйидаги шахсларга нисбатан энг кам ойлик иш ҳақининг 1 баробаридан 3 баробари миқдорида жарима пулини ундириш тўғрисида қарор чиқарилди:
— Фарғона вилояти Қўштепа тумани ҳокими Новиков I.А.,
— Фарғона вилояти Олтиариқ тумани Хотин-қизлар ишлари бўйича ҳоким ўринбосари Салимова Ш.,
— Қашқадарё вилояти Нишон тумани қишлоқ ва сув хўжалиги масалалари бўйича ҳоким ўринбосари Нормўминов У.,
— Жиззах вилояти Пахтакор тумани Давлат солиқ инспекцияси бошлиғи Эргашев А.,
— Сирдарё вилояти Янгиер шаҳар Давлат солиқ инспекцияси бошлиғи Ахмедов К.,
— «Бек барака савдо мажмуаси» МЧЖ директори Турсунов Ю.
Пахта учун пул ва «солиқ» йиғими ҳақида
ОАВ маълумотларига кўра, айрим ҳудудларда пахта терими учун пул маблағларини йиғиш ҳолатлари кузатилмоқда. Ўзбекистон Республикаси Бандлик ва меҳнат муносабатлари вазирлиги Ўзбекистон Республикасида пахта терими учун ҳеч қандай пул йиғимлари ва қўшимча солиқлар назарда тутилмаганлигини эслатиб ўтади.
Аксинча, Бандлик ва меҳнат муносабатлари вазирлиги билан Бош прокуратура ҳузуридаги Мультимедия маркази ҳамкорлигида пахта теримчилари учун яратилган иқтисодий манфаатдорликни ёритиш бўйича кенг кўламли ишлар олиб борилмоқда. Республикадаги меҳнат ресурслари етишмайдиган бешта ҳудудда ўтказиладиган пахта терими тарғиботига бағишланган видеолавҳа @terimuz Telegram-каналида жойлаштирилгач, бир куннинг ўзида 1,6 миллиондан ортиқ одамлар томонидан кўрилди. Пахта теримида қатнашиш истагида бўлган барча фуқаролар +998712000602, @terimuzbot Telegram боти, шунингдек, www.terim.uz сайтида маълумот қолдиришлари мумкин.
Кўнгилли отрядлар ҳақида
Ҳукумат томонидан аҳолини ихтиёрий пахта теримига рағбатлантириш бўйича турли чора-тадбирлар кўрилмоқда. Ана шундай тадбирлардан бири кўнгиллилар орасидан отрядлар тузиш ҳисобланади. Мазкур отряд раҳбарларига пахта мавсуми давомида Ўзбекистон Республикаси Бандлик ва меҳнат муносабатлари вазирлиги ҳузуридаги Жамоат ишлари фонди ҳисобидан отряд томонидан терилган 80 тонна пахта учун 1 миллион сўм миқдорида мукофот пули бериш белгиланган. Пахта терими юқори кўрсаткичда амалга оширилган тақдирда мукофот пули ойига 2 миллиондан кўпроққа етиши мумкин.
Шу муносабат билан, бу йил пахта теримида ишлаб топилган маблағларга ҳеч қандай солиқ солинмаслигини эслатиб ўтамиз.
Қўшимча чора-тадбирлар ҳақида
2018 йил 27 сентябрь Ўзбекистон Республикаси Бандлик ва меҳнат муносабатлари вазири Ш.Кудбиев топшириғи бўйича вазирнинг биринчи ўринбосари Э.Мухитдинов пахта йиғим-терими кампанияси мониторингини амалга ошираётган Халқаро меҳнат ташкилоти мутахассислари ва бир гуруҳ ҳуқуқ ҳимоячилари билан учрашув ўтказди. Учрашувда томонлар пахта теримига мажбурий жалб қилиш ҳолатларини аниқлаш бўйича ҳамкорлик олиб боришга келишди.
Вазирлик ҳузурида пахта теримига мажбурий жалб қилиш ҳолатларини аниқлаш бўйича ОАВ ҳамда ижтимоий тармоқлар мониторингини юритувчи гуруҳ ташкил этилган.
Вазирлик мутахассислари томонидан Ўзбекистон Республикаси Маъмурий жавобгарлик тўғрисидаги кодекснинг 51-моддаси «Меҳнатга маъмурий тарзда мажбурлов» бўйича жарима миқдорини сезиларли даражада, яъни биринчи қонунбузарлик ҳолатида энг кам ойлик иш ҳақининг 25-50 баробари ва такрорий ҳолатда энг кам ойлик иш ҳақининг 50-100 баробари миқдорида оширишга қаратилган ҳужжат кўриб чиқиш учун тайёрланмоқда.
Ўзбекистон Республикаси Бандлик ва меҳнат муносабатлари вазирлиги пахта теримига мажбурий жалб қилиш ҳолати кузатилганда фуқаролар вазирликнинг +998712000601 рақами ёки @mehnathuquqbot Telegram бот ишонч тармоқларига мурожаат қилишлари зарурлигини эслатиб ўтади.
Изоҳ (0)