Франциялик экспертлар Луврдаги кўргазма учун сараланган Ўзбекистон музейлари экспонатлари ҳолатини ўрганди

28 сентябрь куни Лувр музейи мутахассислари Ўзбекистондаги ишини якунлайди. Бир ҳафта давомида француз мутахассислари гуруҳи 2021 йили Луврда бўлиб ўтадиган «Ипак йўлида тамаддун ва маданиятлар» кўргазмаси учун Ўзбекистон музейларидан дастлабки сараловдан ўтган экспонатлар ҳолатини тадқиқ этди. Бу ҳақда Маданият ва санъатни ривожлантириш жамғармасига таяниб, «Газета.uz» хабар берди.

Луврнинг ислом санъатлари бўлими директори Яник Линс ва археолог Ранте Роко бошчилигидаги делегация Абу Райҳон ал Беруний номидаги шарқшунослик институти, «Афросиёб» Самарқанд тарихи музейи, Ўзбекистон Мусулмонлар идораси ҳузуридаги «Мўйи Муборак» мадрасасидаги Муқаддас Қуръон музейи, Пайкент шаҳри тарихи музейи ва Ўзбекистоннинг бошқа музейларига ташриф буюрди.

Изланишлар якунлари бўйича саралаб олинган ҳар бир экспонат бўйича хулоса берилиб, кўргазма учун ягона рўйхат шакллантирилади.

Маданият ва санъатни ривожлантириш жамғармаси хорижда бошқа бир қанча йирик тадбирларни ўтказишни режалаштирмоқда. Вашингтондаги (АҚШ) Саклер Галереяси ва Венадаги (Австрия) Альбертин музейидаги кўргазмалар шулар жумласидан.

Шунингдек, Италиядаги Венеция биенналесида миллий павильон очиш режалаштирилмоқда.