Ўзбекистон ва Россия умумтаълим мактаблари учун ўқитувчиларни тайёрлаш соҳасида ҳамкорлик алоқалари ривожлантирилмоқда. Мазкур масалада Халқ таълими вазирлиги раҳбарияти Россия делегацияси билан музокаралар ўтказди.
Унда «Московский дом соотечественников» ташкилоти директорининг биринчи ўринбосари Юрий Каплун, «Россотрудничество» ташкилотининг Ўзбекистондаги ваколатхонаси раҳбари Виктор Шулика, Пушкин номидаги рус тили давлат институтининг илм-фан бўйича проректори Михаил Осадчий ва Россиянинг Ўзбекистондаги элчихонаси бош маслаҳатчиси Сергей Соколов иштирок этди.
Учрашув давомида томонлар Ўзбекистон ва Россия ўртасида таълим соҳасидаги ҳамкорлик алоқаларини янада ривожлантириш масалаларини муҳокама этди.
Қайд этиш жоизки, Ўзбекистонда ҳозирги кунда ўқитувчилар етишмайди, айниқса, бу ҳолат рус тилида таълим берилаётган мактабларда сезиларли даражада. Халқ таълим вазирлиги томонидан мазкур муаммони ҳал этиш мақсадида бир қатор чоралар кўрилмоқда.
Хусусан, учрашувда вазирлик мутасаддилари ўзбекистонлик ўқитувчиларни тайёрлаш ва қайта тайёрлаш бўйича Россия олий ўқув юртлари билан ҳамкорлик алоқаларини ўрнатиш таклифини илгари сурди.
Изоҳ (0)