АҚШнинг БМТдаги доимий вакили Никки Хейли Эрон президенти Ҳасан Руҳоний Аҳваздаги теракт сабабларини топиш учун «кўзгуга қараши» кераклигини айтди, деб ёзади «РБК».
«АҚШ ҳар қандай жойдаги ҳар қандай террорчилик ҳужумларини қоралайди. Менинг фикримча, ҳодиса сабабларини тушуниш учун Руҳоний ўз ҳудудидаги муаммоларга назар солиши керак. Руҳоний бизни истаганича айблаши мумкин, аммо у кўзгуга қараши керак», — деди у.
Хейли қўшимча қилишича, АҚШ Эронда ёки бошқа бирор жойда режимни алмаштиришга ҳаракат қилмаяпти.
Эслатиб ўтамиз, Эроннинг Аҳваз шаҳрида 22 сентябрь куни ҳарбий парадга қуролланган жангарилар ҳужум уюштирди, оқибатда 29 киши ҳалок бўлди. Теракт учун жавобгарликни ИШИД ҳамда Саудия Арабистони ҳукуматига алоқадор экстремистик гуруҳ ўз бўйнига олди. Бироқ Эрон Қуролли кучлари вакили террорчиларнинг АҚШ ва Исроилнинг «Моссад» разведкаси билан боғлиқлиги борлигини айтди. Теракт муносабати билан Ҳасан Руҳоний АҚШ унинг мамлакатида хавфли вазиятни юзага келтирмоқчи эканлигини маълум қилди.
Изоҳ (0)