Фарғонада Вазирлар Маҳкамасининг 2018 йил 30 августдаги «Йўл ҳаракати хавфсизлиги кунини ўтказиш ва йўл-транспорт ҳодисалари профилактикасининг самарадорлигини ошириш чора-тадбирлари тўғрисида»ги қарори ижроси доирасида илк марта «Автомобилсиз кун» акцияси ўтказилди. Бу ҳақда «Дарё» мухбири Азизжон Эрматов хабар берди.
Ушбу акция муносабати билан Фарғона шаҳрида вилоят ИИБ йўл ҳаракати хавфсизлиги бошқармаси томонидан велосипедчилар ва пиёдалар марафони ташкил этилди. Унда 5 мингдан ортиқ ҳаваскор спортчилар, ёшлар ва фахрийлар иштирок этди.
Марафонда қатнашчилар Навоий кўчасидан Ислом Каримов номидаги театр-концерт саройигача 3 километр масофани босиб ўтди.
«Автомобилсиз кун» акцияси экологик ҳолатни яхшилаш, атмосфера ҳавосини муҳофаза қилиш, транспорт воситаларисиз ҳаракатланиш мумкинлигини ва зарурлигини намойиш қилиш, аҳоли ўртасида соғлом турмуш тарзини шакллантириш мақсадида ўтказилди. Акция орқали йўл ҳаракати иштирокчиларини хавфсизлик қоидаларига риоя этишга ундаш ва ҳайдовчининг транспорт воситасисиз бир кунлик ҳаётини ёритиш ҳам кўзда тутилган.
Мазкур акция энди ҳар ойнинг учинчи жума кунида аҳоли гавжум жойларда доимий тарзда ўтказиб борилади.
Изоҳ (0)