Farg‘onada Vazirlar Mahkamasining 2018-yil 30-avgustdagi “Yo‘l harakati xavfsizligi kunini o‘tkazish va yo‘l-transport hodisalari profilaktikasining samaradorligini oshirish chora-tadbirlari to‘g‘risida”gi qarori ijrosi doirasida ilk marta “Avtomobilsiz kun” aksiyasi o‘tkazildi. Bu haqda “Daryo” muxbiri Azizjon Ermatov xabar berdi.
Ushbu aksiya munosabati bilan Farg‘ona shahrida viloyat IIB yo‘l harakati xavfsizligi boshqarmasi tomonidan velosipedchilar va piyodalar marafoni tashkil etildi. Unda 5 mingdan ortiq havaskor sportchilar, yoshlar va faxriylar ishtirok etdi.
Marafonda qatnashchilar Navoiy ko‘chasidan Islom Karimov nomidagi teatr-konsert saroyigacha 3 kilometr masofani bosib o‘tdi.
“Avtomobilsiz kun” aksiyasi ekologik holatni yaxshilash, atmosfera havosini muhofaza qilish, transport vositalarisiz harakatlanish mumkinligini va zarurligini namoyish qilish, aholi o‘rtasida sog‘lom turmush tarzini shakllantirish maqsadida o‘tkazildi. Aksiya orqali yo‘l harakati ishtirokchilarini xavfsizlik qoidalariga rioya etishga undash va haydovchining transport vositasisiz bir kunlik hayotini yoritish ham ko‘zda tutilgan.
Mazkur aksiya endi har oyning uchinchi juma kunida aholi gavjum joylarda doimiy tarzda o‘tkazib boriladi.
Izoh (0)