Ислом тараққиёт банки делегацияси Халқаро ислом академиясида бўлди

Ислом тараққиёт банки гуруҳи президенти Бандар Ҳажар бошчилигидаги делегация Ўзбекистонда меҳмон бўлиб турибди. Бу ҳақда ЎзА хабар берди.

Делегация аъзолари Ўзбекистон халқаро ислом академиясида бўлди. Меҳмонлар дастлаб академия таркибидаги Манбалар хазинасини кўздан кечирди. Бу ерда сақланаётган нодир қўлёзма асарлар, қадимий қўлёзма ва тошбосма асарлар Ислом тараққиёт банки делегациясида катта қизиқиш уйғотди.

Тадбир доирасида Ислом тараққиёт банки делегациясининг ушбу академия талабалари, магистрант, профессор-ўқитувчилари билан учрашуви бўлиб ўтди. Хорижлик меҳмонлар Ислом тараққиёт банки, унинг фаолияти хусусида атрофлича маълумот берди.

—Ўзбекистонда инсон омилига, ёшлар таълим-тарбиясига устувор аҳамият қаратилаётгани диққатга сазовор, — дейди банк президенти Бандар Ҳажар. — Бу диёр жаҳон илм-фанига, маърифати ривожига муносиб ҳисса қўшган буюк мутафаккирлар, улуғ алломалар ватани. Ёшлар шу табаррук юртга муносиб инсон бўлиб улғайиши керак.

Делегация аъзолари Тошкент вилоятида барпо этилаётган замонавий уй-жойлар билан танишди. Республика ихтисослаштирилган онкология ва радиология илмий-амалий тиббиёт маркази ва бошқа муассасалар, тегишли вазирлик ва идораларда бўлди.