Фарғона вилояти Учкўприк туманида Республика ишчи гуруҳи ташаббуси билан вилоят ҳокимлиги, адлия, ички ишлар, солиқ, тиббиёт бошқармалари, давлат хизматлари агентлиги, тижорат банклари, суд идоралари ҳамкорлигида ўтказилган тадбирда 6000 нафарга яқин одам иштирок этди. Бу ҳақда «Дарё» мухбири Азизжон Эрматов хабар бермоқда.
Тадбир доирасида туман марказий стадионида Шарқий ҳарбий округ қўшинлари қўмондонлиги, вилоят мудофаа ишлари бошқармаси, Миллий гвардия, Ўзбекистон мудофаасига кўмаклашувчи «Ватанпарвар» ташкилоти ҳамкорлигида «Ватан олдидаги бурч» шиори остида кўргазмали тадбир бўлиб ўтди. Унда иштирокчиларга 50 дан ортиқ турдаги ҳарбий техника намуналари, узоқликни аниқлаш ва мўлжалга олиш мосламалари, шунингдек, алоқа воситалари намойиш этилди.
Миллий гвардия, ҳарбий қисмлар ва вилоят ички ишлар бошқармаси махсус бўлинмаларининг ҳарбий-жанговар чиқишлари ўтказилди. Унда иштирок этган 3 мингдан ортиқ ёшлар ҳарбий қурол-яроғ ва техникалар, ҳарбий хизматчиларнинг яшаш шароити билан яқиндан танишди.
Сайил давомида уюштирилган меҳнат ярмаркасида 106 корхона ва ташкилот қатнашиб, 826 та бўш иш ўрнини таклиф қилди. Ярмаркада 774 нафар киши иш билан таъминланди.
Вилоят соғлиқни сақлаш бошқармаси томонидан ўтказилган бепул тиббий кўрикда 27 турдаги мутахассислик бўйича 54 нафар малакали шифокор иштирок этди. 369 нафар аҳоли бепул тиббий кўрикдан ўтказилиб, уларнинг 107 нафарида турли касалликлар аниқланди. 98 нафар фуқарога амбулатор тарзда даволаниш учун, 9 нафарига эса шифохона шароитида даволаниш учун йўлланмалар берилди. Флюорогорафия аппаратидан 167, УТТдан 83, ЭКГ текширувларидан эса 48 нафар фуқаро ўтди.
Туман адлия бўлими, давлат нотариал идоралари, ФҲДЁ бўлими, давлат хизматлари маркази ходимлари, жиноят ва фуқаролик ишлари бўйича, иқтисодий ҳамда маъмурий судлар судьялари, адвокатлар, юридик хизматлар ходимлари томонидан 1100 нафарга яқин жисмоний ва юридик шахслар вакиллари сайёр тартибда қабул қилиниб, бепул ҳуқуқий маслаҳатлар ва тушунтиришлар берилди. Адлия бошқармаси томонидан аҳолининг ҳуқуқий онги ва ҳуқуқий маданиятини янада оширишга қаратилган 30 дан ортиқ кўргазмали плакатлар жойлаштирилди, 30 турдаги 1 500 дона буклетлар тарқатилди.
Давлат хизматлари агентлигининг вилоят бошқармаси ва туман давлат хизматлари марказлари томонидан фуқароларга давлат хизматлари турлари бўйича тушунтириш берилиб, соҳага доир 600 дан ортиқ буклетлар тарқатилди. 10 нафар фуқаронинг фарзандлари мактабгача таълим муассасасига жойлашиш учун навбатга қўйилди, электрон рақамли имзо олиш истагида бўлган 20 нафар фуқарога ЭРИ калитлари тақдим этилди.
Изоҳ (0)