Farg‘ona viloyati Uchko‘prik tumanida Respublika ishchi guruhi tashabbusi bilan viloyat hokimligi, adliya, ichki ishlar, soliq, tibbiyot boshqarmalari, davlat xizmatlari agentligi, tijorat banklari, sud idoralari hamkorligida o‘tkazilgan tadbirda 6000 nafarga yaqin odam ishtirok etdi. Bu haqda “Daryo” muxbiri Azizjon Ermatov xabar bermoqda.
Tadbir doirasida tuman markaziy stadionida Sharqiy harbiy okrug qo‘shinlari qo‘mondonligi, viloyat mudofaa ishlari boshqarmasi, Milliy gvardiya, O‘zbekiston mudofaasiga ko‘maklashuvchi “Vatanparvar” tashkiloti hamkorligida “Vatan oldidagi burch” shiori ostida ko‘rgazmali tadbir bo‘lib o‘tdi. Unda ishtirokchilarga 50 dan ortiq turdagi harbiy texnika namunalari, uzoqlikni aniqlash va mo‘ljalga olish moslamalari, shuningdek, aloqa vositalari namoyish etildi.
Milliy gvardiya, harbiy qismlar va viloyat ichki ishlar boshqarmasi maxsus bo‘linmalarining harbiy-jangovar chiqishlari o‘tkazildi. Unda ishtirok etgan 3 mingdan ortiq yoshlar harbiy qurol-yarog‘ va texnikalar, harbiy xizmatchilarning yashash sharoiti bilan yaqindan tanishdi.
Sayil davomida uyushtirilgan mehnat yarmarkasida 106 korxona va tashkilot qatnashib, 826 ta bo‘sh ish o‘rnini taklif qildi. Yarmarkada 774 nafar kishi ish bilan ta’minlandi.
Viloyat sog‘liqni saqlash boshqarmasi tomonidan o‘tkazilgan bepul tibbiy ko‘rikda 27 turdagi mutaxassislik bo‘yicha 54 nafar malakali shifokor ishtirok etdi. 369 nafar aholi bepul tibbiy ko‘rikdan o‘tkazilib, ularning 107 nafarida turli kasalliklar aniqlandi. 98 nafar fuqaroga ambulator tarzda davolanish uchun, 9 nafariga esa shifoxona sharoitida davolanish uchun yo‘llanmalar berildi. Flyurogorafiya apparatidan 167, UTTdan 83, EKG tekshiruvlaridan esa 48 nafar fuqaro o‘tdi.
Tuman adliya bo‘limi, davlat notarial idoralari, FHDYo bo‘limi, davlat xizmatlari markazi xodimlari, jinoyat va fuqarolik ishlari bo‘yicha, iqtisodiy hamda ma’muriy sudlar sudyalari, advokatlar, yuridik xizmatlar xodimlari tomonidan 1100 nafarga yaqin jismoniy va yuridik shaxslar vakillari sayyor tartibda qabul qilinib, bepul huquqiy maslahatlar va tushuntirishlar berildi. Adliya boshqarmasi tomonidan aholining huquqiy ongi va huquqiy madaniyatini yanada oshirishga qaratilgan 30 dan ortiq ko‘rgazmali plakatlar joylashtirildi, 30 turdagi 1 500 dona bukletlar tarqatildi.
Davlat xizmatlari agentligining viloyat boshqarmasi va tuman davlat xizmatlari markazlari tomonidan fuqarolarga davlat xizmatlari turlari bo‘yicha tushuntirish berilib, sohaga doir 600 dan ortiq bukletlar tarqatildi. 10 nafar fuqaroning farzandlari maktabgacha ta’lim muassasasiga joylashish uchun navbatga qo‘yildi, elektron raqamli imzo olish istagida bo‘lgan 20 nafar fuqaroga ERI kalitlari taqdim etildi.
Izoh (0)