Марғилондаги «Атлас байрами» фестивалида 30 дан ортиқ мамлакат вакиллари иштирок этмоқда (фото)

Марғилон шаҳрида «Атлас байрами» анъанавий тўқимачилик фестивали давом этмоқда. Бу ҳақда «Дарё» мухбири Азизжон Эрматов хабар берди.

13 сентябрь куни фестиваль доирасида Марғилон ҳунармандчиликни ривожлантириш марказида ёш ҳунармандлар учун анъанавий ҳунармандчилик ҳамда либослар дизайни бўйича маҳорат дарслари бўлиб ўтди. Унда таниқли усталар томонидан анъанавий каштадўзлик, табиий бўяш, либослар дизайни бўйича амалий машғулотлар ўтказилди.

Анъанавий тўқимачилик ва тадбиркорлик бўйича амалий тренингни таниқли ҳунармандлар билан бирга, Мўғулистон, Бангладеш каби давлатлардан келган мутахассислар олиб борди.

Халқаро миқёсда ўтказилаётган фестивалда Россия, Хитой, Испания, Франция, Мўғулистон, Қозоғистон, Қирғизистон, Тожикистон каби 30 дан зиёд мамлакатлардан келган усталар, рассомлар, соҳа мутахассислари иштирок этмоқда.

Марғилон азалдан атлас ва адрас тайёрлаш маркази бўлиб келган. Йўқолиб бораётган анъаналарни тиклаш ва асраб-авайлаш мақсадида 2007 йилда Марғилонда ҳунармандчиликни ривожлантириш маркази очилиб, ҳозирга қадар атлас ва адрас матоларини тайёрлаш технологиясини сақлаш, ривожлантириш ва оммавийлаштириш билан шуғулланиб келмоқда.

Бугунги кунда шаҳарда атлас, адрас, беқасам ва шойи тўқиш билан 500 дан ортиқ уста шуғулланади. Ҳунармандлар томонидан қадимий намуналар асосида ишлаб чиқарилаётган «Марғилон», «Наврўз», «Расадхона», «Бибихоним», «Барги карам», «Чақирим», «Намозшомгул», «Қора кўзим», «Бегойим», «Ўзбекистон гўзали», «Қўчқоршох», «Гулдаста», «Келинчак атлас» деб номланган ипак матоларга бугун дунё миқёсида қизиқиш юқори.

Марғилон ҳунармандлари яратган гиламлар, ипак матолар, заргарлик ва зардўзлик буюмлари дунёнинг турли мамлакатларидан келадиган сайёҳларни ҳайратга солмоқда.

Фестивальнинг расмий очилиш маросими 14 сентябрь куни ўтказилади. Асосий тадбирлар шаҳардаги ижодкорлар боғида бўлиб ўтади.