Фарғона вилоятида Мактабгача таълим бошқармаси томонидан мустақилликнинг 27 йиллиги муносабати билан ҳар бир тумандан 27 нафардан эҳтиёжманд болага суннат тўйи қилиб берилди. Бу ҳақда «Дарё» мухбири Азизжон Эрматов хабар бермоқда.
Қўқон шаҳридаги «Ўрда» тантаналар саройида ўтказилган суннат тўйида Бешариқ, Фурқат, Ўзбекистон, Данғара, Учкўприк, Бувайда, Бағдод туманлари ва Қўқон шаҳрида яшовчи эҳтиёжманд оилаларнинг 250 нафардан ортиқ фарзандлари иштирок этди.
Вилоят ва туман ҳокимликлари, жамоат ташкилотлари ҳамкорлигида ўтказилган суннат тўйида болаларнинг ота-оналари, яқин қариндошлари ҳамда дўстлари меҳмон бўлди.
Тўй болаларга сарполар кийдирилиб, ҳомий ташкилотларнинг совғалари топширилди.
«Бугун ўғлим Абдувалининг суннат тўйи бўлди. Эҳтиёжманд оилаларга, айниқса, фарзандларимизга кўрсатилаётган ғамхўрликдан бошимиз кўкка етди. Бунинг учун давлатимиздан, барча саховатли инсонлардан беҳад миннатдормиз», – дейди Бувайда туманининг Найман қишлоғида яшовчи Гулшаной Ўктамова.
Изоҳ (0)