Мамлакатимизнинг мустақиллигининг 27 йиллиги муносабати билан Ўзбекистон Журналистлар ижодий уюшмаси Самарқанд вилоят бўлими ҳамда Каттақўрғон туман ҳокимлиги, «Каттақўрғон» ҳақиқати газетаси ҳамкорлигида туманда олиб борилаётган ислоҳотлар, бунёдкорлик ва ишлаб чиқариш соҳасида бажарилаётган ишларга бағишланган пресс-тур ташкил этилди. Бу ҳақида «Дарё» мухбири Фарҳод Норбўтаев хабар бермоқда.
Тадбир иштирокчиларини туман ҳокими Аъзамхон Баҳромов кутиб олиб, уларга туманда амалга оширилаётган ишлар хусусида маълумот бериб ўтди.
— Каттақўрғонда жуда катта ишларни амалга оширишни режалаштирганмиз. Хусусан, 2019—2029 йиллар давомида туманнинг ижтимоий-иқтисодий ривожлантириш концепцияси ишлаб чиққанмиз. Ушбу концепция асосида лойиҳалаштирилган дастурларимизни босқичма-босқич амалга ошириб, туман аҳолиси иш билан таъминлаш, уларни мароқли дам оладиган масканларни яратиш кўзда тутилган,дейди — Аъзамхон Баҳромов.
2018 йилнинг январь—июнь ойларида туманда 110 та кичик бизнес субъектлари янгидан ташкил этилган бўлиб, 21 та тадбиркорлик субъектларининг муаммоли масалаларига амалий ёрдам берилиб, фаолияти қайта тикланган. Кичик бизнеснинг туман ялпи ҳудудий маҳсулотидаги улуши 90.4 фоизни ташкил қилмоқда.
— Туманимизнинг Пайшанба массивида 1.2 гектар, Иска массивида 3.5 гектар майдонда кичик саноат зоналари ташкил этилиб, умумий ҳисобда 21 та тадбиркорлик субъектлари томонидан қиймати 7.1 миллиард сўмлик лойиҳалар амалга оширилмоқда, — дейди туман ҳокими.
Ушбу лойиҳаларни амалга оширилиши натижасида 170 дан ортиқ янги иш ўринлари ташкил этилади.
Жорий йилда туман ҳудудида кўмирда ишлайдиган, тежамкор 15 та ғишт заводлари қурилиши режалаштирилган бўлиб, бугунги кунда 5 та завод маҳсулот ишлаб чиқаришни бошлаган. Қолган 10 та ғишт заводлари йил охирига қадар ишга туширилиши натижасида 500 та янги иш ўринлари яратилади.
Туманнинг ижтимоий-иқтисодий аҳволини яхшилаш мақсадида ноябрь ойига қадар умумий қиймати 2.4 миллион АҚШ доллари миқдорида тикув фабрикаси қурилиши бўйича инвесторлар билан келишувга эришилган.
Мундиён маҳалласида жойлашган ушбу корхона ишга тушиши натижасида 1200 та доимий иш ўрни яратилади. Маҳсулотлар эса экспортга йўналтирилади. Шунингдек, Хитой инвестицияси иштирокида қиймати 340 миллион АҚШ долларини ташкил этувчи, йиллик қуввати 2.4 миллион тонна цемент ишлаб чиқарувчи «Хенгюан цемент» қўшма корхонаси қурилмоқда. Икки босқичда амалга ошириладиган ушбу лойиҳа доирасда 1500 та янги иш ўрнилари ташкил этилиши кўзда тутилган.
Пресс-тур давомида журналист ва ижодкорлар туманда амалга оширилаётган барча корхона ва ташкилотларни жойида кўриб, уларда амалга оширилаётган ишлар билан яқиндан танишишди.
Изоҳ (0)