Жорий йилнинг 5—7 сентябрь кунлари Тошкент шаҳридаги «Ўзекспомарказ» миллий кўргазмалар мажмуида UzTextile Expo 2018 биринчи тўқимачилик ва мода саноати ва «Тўқимачилик ускуналари ва технологиялари — CAITME 2018» XII Марказий Осиё халқаро кўргазмалари бўлиб ўтади. Бу ҳақда ЎзА хабар берди.
Пойтахтдаги International Hotel Tashkent меҳмонхонасида ташкил этилган матбуот анжумани ушбу халқаро кўргазмаларнинг ўтказилиши ва аҳамиятига бағишланди.
«Ўзтўқимачиликсаноат» уюшмаси бошқаруви кенгаши аъзоси Ж.Рустамбеков, Iteca Exhibitions халқаро кўргазмалар компанияси бош директори Н.Ҳасанова ва бошқалар мамлакат тўқимачилик ва тикув-трикотаж соҳасини ривожлантиришга қаратилаётган эътибор шу йўналишда амалга оширилаётган ишларни янги босқичга кўтариб, бунда тизимга энг янги технологияларни жалб қилиш, ишлаб чиқариш қувватларини модернизациялаш ва ўзаро манфаатли ҳамкорликни мустаҳкамлашга кенг имкониятлар очилаётганини таъкидлади.
«Ўзтўқимачиликсаноат» уюшмаси тизимидаги Тўқимачилик маҳсулотлари рекламаси ва маркетинги агентлиги ҳамда Iteca Exhibitions халқаро кўргазмалар компанияси ҳамкорлигида ташкил этилаётган мазкур кўргазмалар тўқимачилик соҳасидаги ишлаб чиқаришнинг барча босқичларини, яъни ип толаларидан тортиб, тайёр маҳсулотгача бўлган жараёнларни ўз ичига қамраб олган.
UzTextile Expo 2018 биринчи тўқимачилик ва мода саноати халқаро кўргазмасида Ўзбекистон, Беларусь, Латвия, Тожикистон, Туркия, Хитой, Швейцария, Ҳиндистон давлатларидан 103 та компания ва фирманинг иштироки кутилмоқда. Жумладан, унда Ўзбекистондаги тўқимачилик жиҳозлари, тикув-трикотаж маҳсулотлари, экологик тоза хом ашёдан эркак, аёл ва болалар кийимларини ишлаб чиқариш, хом ашё етиштиришга ихтисослашган 70 га яқин етакчи, кичик ва ўрта бизнес вакиллари хорижлик ҳамкорларга ўз салоҳияти ва тажрибаларини намойиш этиш имконига эга бўлади.
Ўзбекистонда 2017 йил бошида 293 та экспортчи корхона мавжуд бўлган бўлса, йил охирида уларнинг сони 350 тага етди. Хорижий давлатларда ташкил этилган 64 та савдо уйи фаолияти туфайли экспорт кўрсаткичлари сезиларли даражада ортгани эътиборлидир.
«Тўқимачилик ускуналари ва технологиялари — CAITME 2018» XII Марказий Осиё халқаро кўргазмаси тўқимачилик ускуналари бўйича МДҲ ҳудудидаги энг йирик кўргазма ҳисобланади. Бу йилги кўргазма қатнашчиларининг 15 фоизи маҳаллий, 85 фоизи хорижий компаниялар вакилларидир. Хусусан, у Ўзбекистон, Австрия, АҚШ, Бельгия, Буюк Британия, Венгрия, Германия, Испания, Италия, Қозоғистон, Нидерландия, Жанубий Корея, Россия, Туркия, Франция, Хитой, Чехия, Швеция, Швейцария, Япония, Ҳиндистон каби давлатлардан 372 та компания ва фирмаларни қамраб олади. Уларнинг 20 фоиздан ортиғи биринчи марта иштирок этади.
Кўргазма доирасида халқаро конференция ҳам ташкил этилади.
Изоҳ (0)