27 август куни Олий Мажлис Қонунчилик палатасининг навбатдаги йиғилиши бўлиб ўтди. Унда депутатлар давлат бюджетининг ва давлат мақсадли жамғармалари бюджетларининг 2018 йил биринчи ярим йилликдаги ижроси якунларини кўриб чиқди. Бу ҳақда Ташқи ишлар вазирилиги матбуот хизмати хабар берди.
Ушбу масала даставвал сиёсий партиялар фракцияларининг ва Ўзбекистон Экологик ҳаракати депутатлар гуруҳининг, шунингдек, Қонунчилик палатаси масъул қўмитасининг кенгайтирилган мажлисларида муҳокамалардан ўтказилган эди.
Мажлис аввалида депутатлар Ўзбекистон Президентининг 22 августда қабул қилинган, давлат бюджетининг ва давлат мақсадли жамғармалари бюджетларининг шаклланиши ҳамда ижроси жараёнларини такомиллаштиришга, бунда аҳолининг бевосита иштирокини таъминлашга қаратилган «Бюджет маълумотларининг очиқлигини ва бюджет жараёнида фуқароларнинг фаол иштирокини таъминлаш чора-тадбирлари тўғрисида»ги қарорига алоҳида эътибор қаратиб, ушбу ҳужжат бюджет маълумотларининг очиқлиги ва шаффофлигини янада оширишга, бюджет маблағларининг шаклланиши ҳамда сарфланиши устидан парламент ва жамоатчилик назоратини янада кучайтиришга хизмат қилишини таъкидлади.
Мажлисда Ҳаракатлар стратегиясида белгиланган устувор вазифаларни изчил амалга ошириш, жамиятнинг ижтимоий-иқтисодий соҳаларини тубдан ривожлантириш бўйича Президент ва ҳукумат томонидан эртанги кун талабларига жавоб берадиган тизимли ислоҳотларнинг юритилиши иқтисодиётни янги асосда ташкил этиш, янада эркинлаштириш, ишлаб чиқаришни модернизация ва диверсификация қилиш, ҳудудларнинг хом ашё ва ресурс салоҳиятидан оқилона фойдаланиш, фаол инвестиция сиёсати юритиш ҳамда бизнес муҳитини яхшилашнинг кенг имкониятларини яратиб, 2018 йилнинг биринчи ярим йиллигида макроиқтисодий барқарорликни ва иқтисодий ўсишнинг юқори суръатларини таъминлаш имкониятини яратгани алоҳида қайд этилди.
Йиғилишда аҳолининг турмуш шароитини янада яхшилаш, «Обод қишлоқ», «Обод маҳалла», арзонлаштирилган уй-жойлар қуриш сингари ижтимоий аҳамияти юқори бўлган йирик лойиҳаларни амалга ошириш борасида Президент томонидан белгиланган вазифаларни бажариш давлат бюджети ижросининг устувор йўналишлари бўлгани алоҳида эътироф этилди. Жумладан, таълим соҳасига ижтимоий харажатларнинг 52,2 фоизи ажратилгани, соғлиқни сақлаш соҳасига Давлат бюджетидан йўналтирилган маблағлар миқдори 4 178,8 миллисрд сўмни ташкил этгани шуни кўрсатиб турибди.
Мажлис якунларига кўра, давлат бюджетининг ва давлат мақсадли жамғармалари бюджетларининг 2018 йил биринчи ярим йиллигидаги ижроси тўғрисидаги ҳисоботни тасдиқлаш ҳақида қарор қабул қилинди.
Изоҳ (0)