Мамлакатимиз тараққиётининг ўтган чорак асрдан зиёд даври давомида барча соҳаларда олиб борилган кенг кўламли ислоҳотлар сирасида демократик сайлов тизими ва миллий сайлов қонунчилиги шаклланди ҳамда изчил такомиллаштирилиб келинмоқда. Қарор топган сайлов тизими Ўзбекистон Республикаси Конституциясида мустаҳкамланган принципларга ҳамда умумеътироф этилган халқаро сайлов стандартларига тамомила мосдир.
Давлатимиз раҳбари ташабуси билан ишлаб чиқилган «2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясига мувофиқ қабул қилинган «Фаол тадбиркорлик, инновацион ғоялар ва технологияларни қўллаб-қувватлаш йили»да амалга оширишга оид давлат Дастури тўғрисида»ги Фармон иловасининг 2, 5 ва 7-бандларида миллий сайлов тизимини ислоҳ этиш юзасидан долзарб муҳим вазифалар белигилаб берилган.
Мамлакатимиз тарихида биринчи марта 2017 йил 22 декабрь куни Ўзбекистон Республикаси Президенти Олий Мажлисга Мурожаатнома билан юзланди. Бу замоновий давлатчилигимиз тарихида улкан ўзгариш ясаган воқеа бўлди.
Парламентга тақдим этилган Мурожаатноманда қабул қилинган 5 та Қонун ва бир қатор қонуности ҳужжатлари, афсуски, ҳалигача яхлит бир ҳужжат шаклига келтирилмаганлиги, шу сабабли халқаро норма ва стандартларга жавоб берадиган ягона Сайлов кодексини ишлаб чиқиш ва қабул қилиш лозимлиги таъкидлаган. Сайлов кодексини ишлаб чиқилиши ва қабул қилиниши, сайлов тизимимизнинг бундан буёнги такомиллаштирилиши миллий сайлов қонунчилигимиз ривожидаги янги босқич деб эътироф этилиши лозим.
Сайлов кодексини яратишнинг асосий мақсади:
- фуқароларнинг сайлов ҳуқуқларини ҳимоя қилишнинг қўшимача амалий механизмларини такомиллаштириш;
- сайлов қонунчилигини тизимлаштириш, унификациялаш (бир хиллаштириш);
- сайлов ҳуқуқи нормалари иерархиясини таъминлаш;
- сайлов жараёни очиқлигининг кафолатлари кучайтиришдан иборат.
Х.А.Абдураҳманов
Ўзбекистон Республикаси Марказий сайлов комиссияси Котибияти
Ташкилий-методик бўлими бошлиғи
Изоҳ (0)