Тошкент шаҳар Олмазор туманидаги 58 та маҳаллаларни тўлиқ қамраб олган ҳолда бўш турган объектларни аниқлашга қаратилган хатлов ўтказилди, дея хабар бермоқда Ўзбекистон Республикаси Бош прокуратураси.
Бу Ўзбекистон Республикаси Бош прокуратураси, Қурилиш вазирлиги, Хусусийлаштирилган корхоналарга кўмаклашиш ва рақобатни ривожлантириш Давлат қўмитаси, Давлат Солиқ қўмитаси, Ер ресурслари, геодезия, картография ва давлат кадастри хизмати қўмитаси ҳамда Тошкент шаҳар ҳокимлиги томонидан Олмазор туманида бўш турган, фойдаланилмаётган ёки самарали фойдаланилмаётган бинолар, иншоотлар, ишлаб чиқариш объектлари ва майдонларини тўлиқ хатловдан ўтказиш ҳамда ишга туширишга қаратилган Қўшма фармойишга асосан амалга оширилди.
Хатлов натижасида 447 та шундай объектлар аниқланди. Ҳозирги кунда инвестиция, иқтисод бошқармаси ҳамда тижорат банклари иштирокида инвестиция лойиҳалари ишлаб чиқилиб, уларни тўлиқ иш бошлаши чоралари кўрилмоқда.
Масалан, Тошкент шаҳар прокуратурасининг кўмагида Чангалзор-Мавзук кўчасида жойлашган бир неча йиллардан буён фойдаланмай бўш турган умумий 1,1 га ер майдонидаги 140 кв.м. бино-иншоотларда мулкдор «Ҳолос» МЧЖ томонидан темир-бетон маҳсулотлар ишлаб чиқаришни ташкил этиш лойиҳаси Хусусийлаштирилган корхоналарга кўмаклашиш ва рақобатни ривожлантириш Давлат қўмитасининг жамғармаси маблағлари ҳисобига амалга оширилмоқда.
Изоҳ (0)