Фаолиятини қонуний йўлга қўйган якка тартибдаги тадбиркорлар қарздорлиги ҳисобдан чиқарилади, деб ёзади Spot Давлат солиқ қўмитаси матбуот хизматига таяниб.
Хабарга кўра, Президентнинг «Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида»ги фармонига асосан ушбу ҳужжат кучга кирган вақтда мавжуд бўлган қатъий белгиланган солиқ ва ушбу қарздорлик учун ҳисобланган пенялар бўйича қарздорлик, шунингдек, молиявий жарималар ва суд харажатлари (суд чиқимлари бундан мустасно) бўйича ҳисобланган қарздорликлар ҳисобдан чиқарилмоқда.
Фармон асосида якка тартибдаги тадбиркорлар сифатида давлат рўйхатидан ўтмасдан фаолият олиб бораётган жисмоний шахслардан тегишли фаолият тури бўйича ўрнатилган ставкадан келиб чиқиб ҳисобланган бир йиллик миқдордаги қатъий белгиланган солиқни бир йўла ундириш тартиби ҳам бекор қилинмоқда.
Қарздорлиги ҳисобдан чиқарилаётган шахсларга кимлар киради?
«2018 йил 1 апрелга қадар якка тартибдаги тадбиркор мақомини йўқотган жисмоний шахсларга ва 2018 йил 1 апрелдан молиявий-хўжалик фаолиятини амалга оширмаётган (шу жумладан, фаолиятини вақтинча тўхтатган) якка тартибдаги тадбиркорларга қарздорликни ҳисобдан чиқариш тартиби қўлланилмоқда», — деди Давлат солиқ қўмитасининг Солиқ қарзини ундиришни ташкил этиш бошқармаси бошлиғи Жаҳонгир Ражабов.
Таъкидланишича, республикада мавжуд бўлган қатъий белгиланган солиқлар миқдори 89,8 млрд. сўм, ушбу қарздорлик учун ҳисобланган пенялар миқдори 31,8 млрд. сўм, молиявий жарималар ва суд харажатлари (суд чиқимлари бундан мустасно) бўйича ҳисобланган қарздорлик миқдори 637,7 млрд. сўмга тенг бўлиб, мазкур қарздорликлар тегишли тартибда ҳисобдан чиқарилиши кўзда тутилмоқда.
Изоҳ (0)