Корея Республикасида 2018 йил 17—23 август кунлари бўлиб ўтган 29-Халқаро ёшлар форумида Ўзбекистонлик ёшлар ҳам қатнашди. Бу ҳақда тадбир иштирокчиси, Жанубий Кореядаги Йоннам университети магистратура босқичи талабаси Раҳмонжон Аҳмаджонов «Дарё»га маълум қилди.
Сеул ва Гоянг шаҳарларида ўтказилган форумда дунёнинг 60 дан ортиқ мамлакатидан келган 155 киши қатнашди, улар орасида тўрт нафар ўзбекистонлик ҳам бор эди.
Ушбу Халқаро ёшлар форумининг бош мавзуси — «Тўртинчи саноат инқилоби ёшлар билан: Келажакдаги ҳаёт» бўлди. Кореянинг етакчи университетлари профессорлари ушбу мавзуда маърузалар ўқиди. Сўнг иштирокчилар гуруҳларга бўлиниб, бош мавзу асосидаги кичик мавзулар бўйича баҳс-мунозаралар олиб борди. Якунда эса улар томонидан лойиҳалар, режалар ва таклифлардан иборат тақдимот ўтказилди.
Шунингдек, форум доирасида Кореянинг диққатга сазовор жойларига икки кунлик сафар ҳам уюштирилди. Форумда иштирок этиш учун барча харажатлар ҳомий ташкилотлар томонидан қоплаб берилди.
Тадбирга Корея Республикаси Жинсий тенглик ва оила вазирлиги мезбонлик қилди. Ташкилотчилар — Корея ёшлар ташкилотлари миллий кенгаши ва Мёнгжи университети Саноат ва академик ҳамкорлик фонди. Ҳомийлар — Жаҳон Ёшлар Ассамблеяси ва Осиё Ёшлар Кенгаши.
Изоҳ (0)