Самарқандда йил охиригача 12 та меҳмонхона қуриб битказилади. 2019 йил октябригача яна 15 та, 2020 йил мартигача эса яна 17 та меҳмонхонани фойдаланишга топшириш кўзда тутилган, дея хабар бермоқда Spot.
Ўзбекистон Президентининг 2018 йил мартида Самарқандга ташрифи чоғида туристлар оқимининг кескин кўпайишини инобатга олиб, 2018—2019 йилларда 25 та меҳмонхона қуриш бўйича топшириқ берган.
Унинг ижросини ўз вақтида таъминлаш мақсадида 44 та лойиҳа таклифлари шакллантирилган. Бугунги кунда 28 та лойиҳа бўйича амалий ишлар бошланган. Барча лойиҳалар якунига етказилиши натижасида 7 мингдан ортиқ туристга меҳмонхона хизмати кўрсатиш имконияти яратилади.
Бундан ташқари, уй меҳмонхоналарини ташкил этиш бўйича 5 та лойиҳа бўйича амалий ишлар бошланган. Ҳозирда шаҳарда 107 та меҳмонхона бўлиб, ўтган олти ой ичида яна иккита янги меҳмонхона ўз фаолиятини бошлади
Маълумотларга кўра, 2018 йилнинг январь—июнь ойларида Самарқанд вилоятига 160 мингдан ортиқ хорижий ва 1 миллионга яқин маҳаллий сайёҳлар ташриф буюрди. Режа бўйича, бу йил вилоятга 350 минг хорижий ва 1,5 миллион маҳаллий туристларнинг Самарқандга саёҳатини ташкиллаштириш кўзда тутилган.
Изоҳ (0)