Қозоғистон Халқ банки Ўзбекистонда 2018 йил охиригача ўз тармоғини очмоқчи

Қозоғистон Халқ банки бошқарув раиси Умут Шаяхметова Ўзбекистон бозорига чиқиш режалари ҳақида гапириб берди, деб ёзади «Review.uz».

«Яқинда Қозоғистон Миллий банки Ўзбекистон билан ҳукуматлараро келишувни имзолади, унинг доирасида маҳаллий банкларга ушбу мамлакатда шўъба ваколатхоналарини очиш имконини берувчи чоралар кўрилди. Айни пайтда биз Қозоғистон ва Ўзбекистон регуляторларига рухсат берувчи ҳужжатларни топшириш босқичидамиз», — деди у.

Халқ банки бошқарув раиси банк тармоғи 2018 йил охиригача очилишини маълум қилди.

«Албатта, Қозоғистон Ўзбекистондан кўра анча ривожланганроқ. Аммо бу мамлакатда улкан потенциал мавжуд. Биринчи навбатда, бу аҳоли сони. Иккинчи навбатда, бу давлатда молия бозори қайта туғилиш босқичида турибди, шу сабабли активлар, даромадлар, мижозлар ва бизнеснинг ўзини йилига юз фоизлаб ўстириш имконияти бор. Шу сабабли биз бу бозорга жуда оптимистик назар билан қараймиз», — деди у.